Kitapsúıer kishkentaılar

Mádenı sharanyń maqsaty – halyq arasynda kitap oqý mádenıetin qalyptastyryp, jas urpaqtyń rýhanı qazynasyn molaıtyp, qazirgi aqyn-jazýshylardyń jańa shyǵarmalaryn nasıhattaýdy kózdegen.

Bul kúni kitaphana esigi qala turǵyndary men oqyrmandaryna aıqara ashylyp, túnniń bir ýaǵyna deıin qyzmet kórsetti. Is-sharanyń mazmundy ótýine elimizdegi Úndistan, Túrkııa, Polsha, Armenııa elshilikteri de belsendi atsalysyp, olar kitap kórmesin uıymdastyryp, konserttik baǵdarlama usyndy. Elordadaǵy «Orys úıiniń» jetekshisi Olga Fılonova «Astana – beıbitshilik besigi» atty ashyq dıktantqa qatysqan kitaphana oqyrmandaryn marapattap, atalǵan kitaphanalar júıesine jańa kitaptardy syıǵa tartty.

Sondaı-aq is-shara aıasynda Tolymbek Ábdiraıym men Serikbol Hasan sekildi bala­lar jazýshylarymen kezdesý uıym­das­tyrylyp, olar balalarǵa óz shyǵar­mashylyqtary men keıingi shyqqan kitaptary týraly aıtyp berdi. Al «Qarashańyraq» ulttyq tárbıe berý mektebiniń jetekshisi Turar Sattarqyzy jas oqyrmandar men qo­naqtarǵa ulttyq tárbıe týraly taǵy­lymdy oı tolǵasa, «Meniń qa­laýym­daǵy kitaptar» atty BookDating alańy­nyń spıkerleri telejúrgizýshi Áıgerim Esen­áli, tarıhshy Jaqsylyq Sábıtov jáne jýr­nalıst Rýslan Ydyrysov ózderiniń ómir jolyna erekshe áser etken úsh kitap jaıynda áńgimeledi. «Avangard» poezııa klýbynyń jetekshisi, aqyn Dına Oraz óleń jazýǵa qu­martqan balalarǵa sheberlik sabaǵyn ót­kizse, qummen sýret salý úıirmesiniń jetek­shisi Aıjan Járkeshqyzy osy ónerdiń qyr-syryn úıretti.

Sonymen qatar Erkeǵalı Rahmadıev atyn­daǵy Memlekettik akademııalyq fı­lar­monııasy men «Naz» memlekettik bı teatry­nyń ónerpazdary mádenı keshtiń kó­ri­gin qyzdyrsa, elordalyq Qýyrshaq teatry­­nyń ártisteri balalarǵa qyzyqty oıyn­dar oınatyp, tátti syılyqtar tartý etti. «Zamandas 21» qoǵamdyq qory múshe­leri ulttyq naqyshta jasaǵan qol óner buıym­dary jármeńkesin uıym­das­tyrdy.

Bir sózben aıtqanda, «Aı sáýlesimen kitap oqıyq» atty kitaphana túnine arnal­ǵan is-shara oqyrmandarǵa jyly áser qal­dyrdy.