Qazaqstandyq kolledjder 4 myńnan astam bilim berý baǵdarlamasyn ázirlep, jańartty. Baǵdarlamalardy ázirleý úshin eńbek naryǵynyń qajettilikterin biletin jumys berýshiler tartyldy. Ásirese jumys ornynda belgili bir mamandyqty ıgerý úshin qandaı daǵdylar men mashyqtar qajet ekendigi týraly jumys berýshilerdiń pikiri erekshe eskerildi.
Mysaly, «Eurasia Group Kazakhstan» JShS usynysymen «Aýyl sharýashylyǵyn mehanıkalandyrý» mamandyǵy boıynsha bilim berý baǵdarlamalaryna aýyl sharýashylyǵy tehnıkasynyń elektrıka, gıdravlıka, transmıssııa, navıgasııa jáne otyn júıeleri bólimderin oqytý qosyldy.
«Barlyq bilim berý baǵdarlamasy MJMBS jáne kásiptik standarttardyń sáıkestigine saraptamadan ótip, ári qaraı Bilim berý baǵdarlamalarynyń tizilimine engizedi. Osylaısha, bilim berý baǵdarlamalaryn saraptaý búgingi eńbek naryǵynyń qajettilikterine jáne talaptaryna sáıkes keletin baǵdarlamalardy tańdaýǵa múmkindik berdi. Oqytýdyń mynadaı baǵyttary boıynsha bilim berý baǵdarlamalary ázirlendi: ınjenerlik, óńdeý jáne qurylys tehnologııalary, bilim berý, qyzmet kórsetý salasy, qarjy jáne quqyq, aqparattyq-kommýnıkasııalyq tehnologııalar (AKT) jáne t.b. ázirlenip jatqan bilim berý baǵdarlamalarynyń ózektiligi men sapasyn qamtamasyz etý úshin kolledjder janyndaǵy Indýstrııalyq keńester sanyn ulǵaıtý jóninde sharalar qabyldandy. Buryn olardyń sany 513 bolsa, qazir 578-ge jetip otyr. Iаǵnı bilim berý baǵdarlamalaryn ázirleýge atsalysatyn jumys berýshiler sany kóbeıip keledi», dedi Oqý-aǵartý mınıstrligi Tehnıkalyq jáne kásiptik bilim departamentiniń dırektory Nasymjan Ospanova.