Zamanaýı sporttyq-saýyqtyrý kesheni «Atakent» kórme ortalyǵynyń saıabaq bóligimen shekaralasatyn aýmaǵynda ornalaspaq. «Delfın» sport nysany qaıta jóndeýden ótkennen keıin munda eresekter men balalar jyl boıy barynsha qolaıly jaǵdaıda túrli sport túrlerimen jáne fızıkalyq belsendilikpen aınalysa alady, dep habarlaıdy Egemen.kz «Atakent» QIYO» AQ baspasóz qyzmetine silteme jasap.
Sporttyq-saýyqtyrý kesheniniń jalpy aýdany 23 myń sharshy metrdi quraıdy. Jańartylatyn sport ortalyǵynyń ınfraqurylymyna olımpıadalyq standarttyń eki basseıni, jattyǵý jáne gımnastıka zaldary, jekpe-jek, boks jáne kúres, horeografııa jáne bı sabaqtaryna arnalǵan zaldar kiredi. Sondaı-aq sport ǵımaratynyń aýmaǵynda basketbol men voleıbol oınaýǵa arnalǵan arnaıy alańdar da oryn tebedi.
Jańa keshenniń kelýshilerine boks, karate, dzıýdo, taekvondo, sambo, MMA, djıý-djıtsý, kúres, aerobıka, ıoga, júzý, krossfıt, gımnastıka jáne horeografııa sabaqtary qoljetimdi bolady.
Sport kesheniniń ortasha kúndelikti tutynýshylar aǵyny shamamen 2,5 myń adamdy quraıdy.
Erekshe qajettilikteri bar balalardyń sportpen shuǵyldanýy úshin jaǵdaıdy uıymdastyrý da jańartylǵan keshenniń basym mindetteriniń biri. Sondyqtan keshen erekshe qajettilikteri bar jáne tirek-qımyl apparaty buzylǵan balalarǵa arnalǵan arnaıy jabdyqtarmen qamtylady.
«Keshenniń negizgi maqsaty — qoǵamdyq jáne kópfýnksıonaldy sport ortalyǵyna aınalý, sondyqtan biz keshenimizde eń tanymal sport túrlerimen aınalysý múmkindigin qarastyrdyq. Eń bastysy, bizdiń ortalyqta sportpen aınalysý jasyna jáne daıyndyǵynyń deńgeıine qaramastan barlyǵyna derlik qoljetimdi bolady. Eski keshen kóp adam sanyna arnalmaǵan, tehnıkalyq turǵydan eskirgen jáne búgingi kúnniń talaptaryna saı emes. Jańa joba sport jáne belsendi ómir saltyna arnalǵan barlyq zamanaýı sheshimderdi qamtıdy. Jańa sport kesheni qala turǵyndary úshin keremet syılyq bolady dep úmittenemiz», deıdi joba jetekshisi Azat Jıenbaev.
Sport ǵımaratyn qaıta jańartýdy 2024 jyldyń ortasyna qaraı aıaqtaý josparlanyp otyr.