Almaty oblysynyń ákimdigi jol qaýipsizdigin qamtamasyz etý boıynsha turaqty negizde jumys júrgizilip jatqanyn aıtty, dep habarlaıdy Egemen.kz.
Jolaýshylar kóligi jáne avtomobıl joldary basqarmasy jol qaýipsizdigine birinshi kezekte joldar men kóshelerdiń jaǵdaıy áser etetinin basa aıtty.
«Joldar men kóshelerdiń sapasyn 95%-ǵa deıin jaqsartý úshin jyl saıyn keminde 1100 shaqyrymdy (370 shaqyrym jol jáne 725 shaqyrym kóshe) jóndeý qajet. Ol úshin bıýdjetten jyl saıyn 55 mıllıard teńgeden astam (jol jóndeýge 20 mıllıard teńge, kóshe jóndeýge 35 mıllıard teńge) qarajat bólý qajet. Bul qarajat 2023 jylǵa arnalǵan jergilikti bıýdjet jobasynda qarastyrylǵan», dedi Almaty oblysynyń jolaýshylar kóligi jáne avtomobıl joldary basqarmasynyń basshysy Almas Batanov.
Onyń aıtýynsha, jedel shara retinde polısııa bólimimen birlesip, respýblıkalyq mańyzy bar joldardyń 12 apatty ýchaskesinde «Sergek» apparattyq-baǵdarlamalyq júıeleri pılottyq rejımde ornatyldy. Pılottyq rejım oń nátıje bergen jaǵdaıda respýblıkalyq mańyzy bar joldardyń 195 ýchaskesinde «Sergek» keshenderin ornatý josparlanýda.
Sondaı-aq paralleldi túrde kósheler men joldardyń apatty ýchaskelerine, jobalyq qujattamaǵa jol qozǵalysy qaýipsizdigine aýdıt júrgizilýde. Bıyldan bastap «sıfrlyq egiz» jobasy aıasynda geoaqparattyq platforma ázirleý jáne joldardy sertıfıkattaý josparlanýda. 2023 jylǵa arnalǵan jergilikti bıýdjet jobasynda portaldy damytýǵa 396 mln teńge kóleminde qarajat qarastyrylǵan.