Túrkistan oblysy ákimdiginiń jáne oblystyq Mádenıet basqarmasynyń uıymdastyrýymen, Túrkistan tórinde Respýblıka kúnine oraı halyqaralyq «Voice of turan» qazaq ánderi baıqaýy ótti. Eki kún boıy álem elderinen kelgen qatysýshylar qazaq ánderin shyrqap, óz ónerlerin ortaǵa saldy.
Uly Turan dalasyn ánmen terbegen halyqaralyq baıqaýdyń birinshi kúni shartaraptan kelgen qatysýshylar elimizge tanymal estrada ánshilerimen birge qazaq ánderin shyrqap, kórermenge kóterińki kóńil kúı syılady. Ekinshi kúni qatysýshylar aldymen Shámshi Qaldaıaqovtyń «Arys jaǵasynda» ánin birge oryndady. Sodan soń baıqaý talaby boıynsha qazaqtyń tanymal ánderin shyrqap, qazylar alqasynyń baǵasyn aldy. Atalǵan festıval qazaq mýzykasy men qazaqstandyq kompozıtorlardyń úzdik shyǵarmalaryn, sondaı-aq qazaq ánderin álemge nasıhattaý, shyǵarmashyl, daryndy jastardy anyqtaý jáne olarǵa qoldaý kórsetý, halyqaralyq baılanys pen ózara yntymaqtastyqty nyǵaıtý, rýhanı ári mádenı qundylyqtar almasý, Túrkistannyń týrıstik áleýetin arttyrý syndy úlken maqsat qoıǵan. Baıqaýdyń ashylý saltanatynda TÚRKSOI halyqaralyq uıymynyń bas hatshysy Sultan Raev festıval Uly dalanyń, ata-babalarymyzdyń qanynda bar án-jyrdyń merekesi ekenin atap ótti. Bıylǵy baıqaýdyń ereksheligi, Azııa elderinen ǵana emes, Eýropa memleketterinen de ánshiler kelip qatysty. Túrkııa, О́zbekstan, Qyrǵyzstan, Tatarstan, Ázerbaıjan, Polsha, Chernogorııa, Belarýs, Moldova, Grýzııa, Serbııa, Qarashaı-Sherkes respýblıkasy, Býrıatııa, Makedonııa, Bolgarııa elderinen kelgen qatysýshylar elimizge tanymal estrada ánshilerimen birge qazaq ánderin shyrqady. Olardyń qatarynda Tólegen Muhamedjanov, Nurjamal Úsenbaeva, Medeý Arynbaev, Aıgúl Qosanova, Marjan Arapbaeva, Janar Doǵalova, «Melomen» toby, Rýhııa Baıdúkenova syndy mádenıet maıtalmandary men óner juldyzdary bar.
Memlekettik syılyqtyń laýreaty Tólegen Muhamedjanov tóraǵalyq etken qazylar alqasynyń sheshimimen Grýzııa elinen kelgen Tatııa Kobaladze Gran-prı ıegeri atandy. Al 1-oryn Tatarstannan kelgen Ilgız Shaıhrazıevke buıyrdy. Júldeli 2-oryndy serbııalyq Stefan Zdravkovıch pen Polsha ánshisi Mıhal Kachmarek ıelendi. Úshinshi orynǵa Katarına Bogıchevıch (Chernogorııa), Hrıstıana Dankova (Bolgarııa), Navrýza Mahamadjanova (О́zbekstan) laıyqty dep tanyldy. Jeńimpaz ben júldegerlerge arnaıy dıplomdar men qarjylaı syılyqtar, al Gran-prı ıegerine arnaıy statýetka tabystaldy.
Aıta keteıik, buǵan deıin atalǵan baıqaý 2 ret onlaın ótken bolatyn. 2020 jyly Moldova respýblıkasynan Galına Shkoda bas júldeni jeńip alsa, 2021 jyly býrıatııalyq Syden Eshı Bımbaev Gran-prı ıegeri atanǵan. Halyqaralyq án saıysynyń nátıjesinde 4 eldiń úzdik ánshilerinen qurylǵan «Turan Boys» kvarteti baıqaýdyń jabylý saltanatynda án shyrqady.
TÚRKISTAN