Kezekten tys Prezıdent saılaýy aıasynda kandıdattardyń saılaýaldy shtabtarynda oqytý semınary ótýde, dep habarlaıdy Egemen.kz.
«Qarjylandyrý erejelerin, sondaı-aq úgit-nasıhat júrgizý erejelerin buzý aıtarlyqtaı kúrdeli aspekti sanalady. Onda ákimshilik jáne konstıtýsııalyq quqyqtyq jaýapkershilik qarastyrylǵan. Kandıdattardyń shtaby ereje buzsa, kandıtat ornynan túsip qalýy múmkin», dedi Ortalyq saılaý komıssııasynyń tóraǵasy Konstantın Petrov.
OSK múshesi Sábıla Mustafına saılaýdy uıymdastyrý men ótkizýge ketetin shyǵyndardy qarjylandyrý máselesin túsindirdi.
«Saılaýdy qarjylandyrý – saılaýdy ázirleý men ótkizýdi qarjylyq qamtamasyz etýge, saılaýaldy úgit-nasıhat jumystaryn qarjylandyrýǵa baılanysty saılaý is-sharalarynyń jıyntyǵy. Saılaýdy uıymdastyrý men ótkizý jónindegi shyǵystardy qarjylandyrý Qazaqstan Respýblıkasyndaǵy saılaý týraly konstıtýsııalyq zańmen retteledi. Qoldanystaǵy zańnamaǵa sáıkes saılaýdy memlekettik qarjylandyrý jáne memlekettik emes qarjylandyrý normalary qarastyrylǵan. Prezıdent saılaýyn qarjylandyrý respýblıkalyq bıýdjetten jergilikti atqarýshy organdardyń osy maqsattar úshin ashylǵan shottary arqyly júzege asyrylady. Kandıdattardyń saılaýaldy úgit-nasıhat jumystarynyń shyǵystary saılaý naýqandary aıasynda qarjylandyrylady», dedi S.Mustafına.
Eske sala keteıik, 21 qazan kúni saǵat 18:00-de Qazaqstan Prezıdenttigine kandıdattardyń saılaýaldy úgit jumysy bastaldy. Prezıdenttikke kandıdat retinde alty adam tirkelgen.