Elorda irgesindegi kóne Bozoq qalashyǵyn qaıta qurý jáne arheologııa eskertkishiniń túpnusqasyn saqtap botaı, saq, ǵun, túrki tarıhı keshenderin qalpyna keltirýge baǵyttalǵan aýqymdy joba – «Bozoq» ulttyq parkiniń qurylysy bastaldy. Mazmundy shara aıasynda ıgilikti istiń bastalǵanyn beıneleıtin «Ýaqyt kapsýlasyna» estelik jazba qaldyryldy. Oǵan Mádenıet jáne sport mınıstri Dáýren Abaev, L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov, Memleket tarıhy ıınstıýtynyń dırektory Erkin Ábil, belgili arheolog Zeınolla Samashev t.b. zııaly qaýym ókilderi qatysty.
«Bozoq» Ulttyq parki – Astananyń týrıstik brendi ári mańdaıaldy rámizi ǵana emes, elorda turǵyndary men qonaqtarynyń mádenı demalys ornyna aınalyp, ishki jáne halyqaralyq týrızmniń ósýin qamtamasyz etedi.
Is-sharada sóz alǵan Mádenıet jáne sport mınıstri Dáýren Abaev «Bozoq» qalashyǵynyń tarıhı qundylyǵy zor ekenin atap ótti.
«Bul jerde ulttyq saıabaq qurýdaǵy maqsat – tarıhı-mádenı muranyń baı qabatyn saqtaý jáne onymen úndes bolý, ony qalyń jurtqa kórsetip, tanymal etý. Bolashaqta bul aýmaq Uly dala tarıhyn beıneleıtin keshendi arheologııalyq saıabaqqa elordamyzdyń turǵyndaryn ǵana emes, sonymen qatar Qazaqstan men álemniń túpkir-túpkirinen kelgen týrısterdi tartatyn ortalyqqa aınalady», – dedi mınıstr.
Sondaı-aq tarıh ǵylymdarynyń doktory, akademık Erlan Sydyqov kóne qalashyqtyń tarıhy men mańyzy týraly aıta kelip, irgetasy qalanǵan aýqymdy jobaǵa sáttilik tiledi.
Al «Bozoq» memlekettik tarıhı-mádenı mýzeı-qoryǵynyń dırektory Sáýle Býrbaeva búgingi bas qalanyń tarıhy osy shahardan bastalyp, ejelgi dáýirde onda adamdar ómir súrgeni jaıynda ǵylymı negiz bar ekenin jetkizdi.
«Bul týraly 1998 jyly Bozoq qalashyǵyn ashqan esimi álemge tanymal arheolog Kemel Aqyshevtiń ǵylymı tujyrymdamalarynyń arqasynda bilip otyrmyz. Ejelgi shahardyń qırandylary Buzyqty kóliniń shyǵys jaǵalaýynan tabylǵan. Osy 20 jyl ishinde ǵalymdar bul aımaqqa qazba jáne zertteý jumystaryn júrgizip, aýqymdy ister atqardy. Munda tabylǵan árbir jádiger osy aýmaqtyń baı mádenıeti bolǵanyn dáleldeıdi», dedi atalǵan mýzeı-qoryǵynyń basshysy.
Aıta keteıik, joba qurylysy 2025 jylǵa deıin jalǵasady.