Memleket basshysy Qasym-Jomart Toqaev pen Eýropalyq Keńes Prezıdenti Sharl Mıshel kelissózderden keıin buqaralyq aqparat quraldarynyń ókilderi úshin brıfıng ótkizdi, dep habarlaıdy Egemen.kz Aqordanyń resmı saıtyna silteme jasap.
Brıfıng barysynda Memleket basshysy Eýropalyq Keńes Prezıdenti Sharl Mısheldiń Qazaqstanǵa alǵash ret resmı saparmen kelip otyrǵanyn aıtyp, óziniń shaqyrýyn qabyl alǵany úshin rızashylyǵyn bildirdi.
«Kelesi jyly Qazaqstan men Eýropalyq Odaq arasynda dıplomatııalyq qatynas ornaǵanyna 30 jyl tolady. Sondyqtan Sharl Mıshel myrzanyń sapary osy mereıli meje qarsańynda ótip otyrǵany erekshe qýantady. Biz bul saparǵa aıryqsha mán beremiz. Prezıdent Mısheldiń Qazaqstan men Eýroodaq arasyndaǵy yntymaqtastyqty nyǵaıtýǵa qosyp otyrǵan súbeli úlesin joǵary baǵalaımyz. Biz ekijaqty yqpaldastyǵymyzdy jańa sapaly deńgeıge kóterý úshin keń aýqymdy ári mazmundy kelissózder júrgizdik. Kezdesýimiz ózara senim jáne túsinistik rýhynda ótti. Biz mazmundy saıası dıalogtyń qarqynyn odan ári kúsheıtemiz dep ýaǵdalastyq. Sondaı-aq Keńeıtilgen seriktestik jáne yntymaqtastyq týraly kelisim aıasyndaǵy strategııalyq áriptestigimizdi nyǵaıtýǵa nıetti ekenimizdi rastadyq», dedi Qazaqstan Prezıdenti.
Qasym-Jomart Toqaev Eýropalyq Odaq - Qazaqstannyń eń iri saýda jáne ınvestısııalyq seriktesteriniń biri ekenin atap ótti.
Aıta ketsek, 30 jyl ishinde Qazaqstanǵa Eýropadan tartylǵan ınvestısııa kólemi 160 mıllıard dollardan asqan. Al bıylǵy 8 aıda Qazaqstan men Eýropalyq Odaq elderi arasyndaǵy taýar aınalymy 43 paıyzǵa ósip, 26 mıllıard dollarǵa jetti.
Memleket basshysy Sharl Mıshelmen kezdesý barysynda energetıka, «jasyl» ekonomıka, aýyl sharýashylyǵy, kólik jáne logıstıka salalaryndaǵy is-áreketimizge oń baǵa bergenderine toqtaldy. Prezıdenttiń aıtýynsha, taraptar ózara tıimdi is-áreketti odan ári kúsheıtý úshin birlesip jumys isteýge kelisti.
«Ásirese, asa mańyzdy shıkizatty tasymaldaý jáne jasyl sýtegi energetıkasyn damytý máselesinde mol múmkindigimiz bar Sonymen qatar, halyqaralyq kólik dálizderin damytýdyń mańyzdylyǵyn atap óttik. Bul – qazirgi geosaıası jaǵdaıda óte ózekti máseleniń biri. Sondaı-aq, Eýropalyq Odaqtyń «Transkaspıı halyqaralyq kólik baǵytyn» qoldaý múmkindigin qarastyrdyq. Budan bólek, Eýropa sanksııalarynyń Qazaqstan ekonomıkasyna yqpalyn boldyrmaý máselesin talqyladyq», Dep túıindedi Qasym-Jomart Toqaev.