TMD Atqarý Komıteti tóraǵasynyń orynbasary Ilhom Nematov TMD baqylaýshylarynyń mıssııasy saılaý naýqanyna monıtorıng júrgizýge kiriskenin aıtty. Bıyl TMD elderiniń ókilderi Qazaqstanda ótetin kezekten tys prezıdent saılaýyn baqylaıtyn bolady, dep habarlaıdy Egemen.kz.
«Búgin TMD baqylaýshylarynyń mıssııasy saılaý naýqanyna monıtorıng júrgizýge kiristi. Sondaı-aq búgin uıymdastyrýshylyq máselelerdi sheshýmen aınalysatyn mıssııa shtaby qurylady. Shtab óńirler boıynsha qysqa merzimdi, uzaq merzimdi baqylaýshylardy bólip, Qazaqstannyń saılaý zańnamasyn baǵalaý máselelerimen aınalysady. Mıssııany TMD Atqarý komıtetiniń tóraǵasy Sergeı Lebedev basqarady. Maǵan mıssııamyzdyń ashylýyna qatysý tapsyryldy. Mıssııa quramyna barlyq TMD elderiniń ókilderi, TMD Parlamentaralyq Assambleıasynyń, odaqtas Reseı-Belarýs memleketiniń Parlamenttik Assambleıasynyń ókilderi, Astanada akkredıttelgen dıplomattar jáne TMD Atqarý komıtetiniń qyzmetkerleri kiredi», dedi OSK brıfınginde TMD Atqarý Komıteti basshysynyń orynbasary Ilhom Nematov.
Spıkerdiń aıtýynsha, eldegi saılaýǵa júzden astam adam keledi. 10 adam uzaq merzimdi baqylaýshylar jáne 100-den astam qysqa merzimdi baqylaýshylar. Uzaq merzimdi baqylaýshylar elge kelip, akkredıtasııadan ótti. Qysqa merzimdi baqylaýshylar Qazaqstanǵa saılaý bastalardan eki-úsh kún buryn keledi.
Ilhom Nematov mıssııa barlyq aımaqtar men saılaý ýchaskelerin qamtýǵa tyrysady dep málimdedi. Baqylaýshylar ýchaskelerge, aýmaqtyq saılaý komıssııalaryna baryp, saılaý naýqanyna daıyndyq barysyn talqylaıdy.
«Búgin Ortalyq saılaý komıssııasynyń tóraǵasy Nurlan Ábdirovpen kezdesý ótti. Ol saılaý naýqanyna daıyndyq barysy týraly egjeı-tegjeıli habardar etti. Saılaýshylardyń erkin daýys berýine barlyq qolaıly jaǵdaı jasalyp jatyr», dep tolyqtyrdy I. Nematov.