Ertis aýdanynan jolsapardan kele jatyp, jolaı Aqtoǵaıǵa soǵyp edik, aýdan ortalyǵyna kireberisten-aq bizdi yzyńdaǵan sary masa qarsy aldy. Qarsy betten kep soǵylǵan shirkeıden mashınamyzdyń áınegi de saryjaǵal boldy da qaldy. Jalǵyz Aqtoǵaı aýdany emes, jalpy ózi, jyl saıyn jaz shyǵa Ertis ózeni jıeginde otyrǵan aýyldardy sary masa, shybyn-shirkeıdiń mazalaıtyny ras.
Bıyl aýdan ortalyǵy Aqtoǵaıda 3114 túp aǵash, 1115 kóshet egilipti, shybyn-shirkeı jınalmas úshin aýyldardan 4684 tonna qoqys shyǵarylǵan eken. Al, negizinen, sary masa, shybyn-shirkeılerdi ýlaý jumystary oblystaǵy úsh qalada – Aqsý, Ekibastuz jáne oblys ortalyǵynda júrgizilýde. Ýlaýǵa respýblıkalyq bıýdjetten 160 mıllıon teńge bólinip, 26 myńnan astam gektar jer tazaratyny ákimdikte bolǵan otyrysta da aıtyldy. Oblys ákimi Qanat Bozymbaev shybyn-shirkeıdi qur ýlaı salý esh nátıje bermeıtinin eskertti. Ýlaý quraldarynyń sapasy, quramy qandaı degen de másele bar. Bul jumys gıdrotehnıkalyq-sanıtarlyq júıeli sharalar nátıjesinde qolǵa alynýy tıis. Qalalarǵa masa qaıdan keledi demeńiz. Mysaly, Ekibastuzdyń aınalasyndaǵy 60 sý qoımasyn qamys basyp ketipti. Qoımalardy tazalaý ońaı jumys emes. Oblystyq tutynýshylar quqyǵyn qorǵaý departamenti basshysynyń mindetin atqarýshy Sáýle Ospanovanyń aıtýynsha, jalpy, oblys kóleminde jańa talap, órkenıettilik turǵysynan qaraǵanda ınnovasııalyq gıdrotehnıkalyq-sanıtarlyq jumystar jóndi qolǵa alynbaı turǵan sııaqty. Eger bul júıe bútindeı qolǵa alynsa, onda aýyl-qala dep bólmeı keshendi túrde jumys júrgizýge bolýshy edi. Aqtoǵaılyqtar sııaqty basqa aýdan ortalyqtarynyń turǵyndary, aýyldar da sary masa, shybyn-shirkeıge talanbaıtyny anyq.
Farıda BYQAI,
«Egemen Qazaqstan».
Pavlodar oblysy.