Ǵasyr aınasy

Ataýy oblystyq demesek, kezinde Dinmuhamed Qonaev pen Asanbaı Asqarov syndy Alashtyń aıtýly aza­­mattarynyń basyna is tús­kende únsiz qalmaı, qaıratker tulǵalarǵa alǵashqylardyń biri bolyp arasha túsken basylymnyń bedeli qaı kezde de bıik. Sodan da bolar, óńirdiń bas basylymynyń 100 jyldyq mereıtoıyna elimizdiń ár qıyrynan már­tebeli meımandar kelip, aqjarma tilekterin aqtardy.

Balasaǵun atyndaǵy or­talyq konsert zalyna jınal­ǵan jurtshylyq aldymen «Aq jol» gazetiniń foto­til­shisi Aqádil Rysmahannyń «Tas­pada qalǵan tarıh» atty fotokórmesin tamashalady. Kórmege óńirdiń ómiri men talaıly tarıhynan syr shertetin elýge jeteǵabyl sýret qoıylypty. Jınalǵandar ár fotonyń tarıhyna úńilip jatty. Keıinnen basylymda uzaq jyl boıy eńbek etken ardager jýrnalıst Tursynhan Tolqynbaıuly qurastyrǵan «Ǵasyr shejiresi» atty jı­naq­tyń tusaýy kesildi.

Saltanatty is-sharada óńir basshysy Nurjan Nur­jigitov gazet ardageri Tursyn­han Tolqynbaıulyna «Qazaq­stannyń Qurmetti jýrnalısi» tósbelgisin tapsyrsa, basylym qyzmetkerleri Shárbaný Da­nııarova, Esen О́teýlıev, Sándibek Pirenov oblys áki­miniń Alǵys hatyna ıe boldy.

Bul kúni gazettiń 100 jyl­­dyǵyna oraı uıymdas­tyrylǵan «Aq jol» gazeti: Qazaq baspasóziniń búgini men erteńi» taqyrybyndaǵy respýblıkalyq jýrnalıster baıqaýynyń qorytyndysy shyǵaryldy. Qazylar alqa­synyń sheshimimen elordadan kelgen Oljas Sándibek, Ashat Raıqul, jergilikti jýrnalıster Aqmaral Shaǵataı, Aqtoty Jańabaı, Marat Dı­han­baı júldegerler qata­ry­nan kórindi. Olardyń ár­qaı­sysyna 500 myń teńge­niń sertıfıkaty tapsyryldy.

Saltanatty jıyn barysynda sóz alǵan senator Abdaly Nuralıev basylym qyzmetkerleri Orazkúl Ábdikerimova men Shynar Saǵıevany Senat Tóraǵasy Máýlen Áshimbaevtyń Al­ǵys hatymen marapattady. Májilis depýtattary Janar­bek Áshimjan, Meı­rambek Tólepbergen, Gúl­dara Nurymovanyń qut­tyq­taýlary da áriptesterdiń mereıin asyrdy. Májilis Tóraǵasy Erlan Qoshanovtyń sálemin jetkizgen Janarbek Áshimjan gazet qyzmetkerleri Dınara Balaeva men Eset Do­salyǵa Alǵys hat tapsyrdy.

Mereıtoılyq is-sharada sóz sóılegen «Egemen Qazaq­stan» respýblıkalyq gazeti» jaýapkershiligi shekteýli serik­testiginiń bas dırektory Dıhan Qamzabekuly árip­tes­terin mereı­toıymen quttyqtady.

«Halyqtyń kózi, qula­ǵy, tili» bolyp júrgen áriptes­terge degen alǵysym zor. Qazaq handyǵy qasıetti Jambyl jerinde quryldy. Din men dástúrdiń úılesim tapqan jeri de Áýlıeata óńiri sanalady. Júz jyldan áride jatqan tarıhtyń bári balbal tastarda, sanamyzda, eldiń kómeıinde tur. Basy­lym ataýly bizdi barlyq kezeńde biriktirgen. Áli talaı bıik­ter men jaqsy­lyqtarǵa bas­taıtyny daýsyz», dedi D.Qamzabekuly. Sondaı-aq «Habar» agenttigi basqarma tór­aǵa­sy Berik Ýálı de árip­tes­terine degen lebizin jetkizdi.

Is-shara sońynda gazet ardageri Mahanbetáli Dúı­sebaev, «Aq jol» gazeti bas redak­torynyń orynbasary Farıza Ábdikerimova, «Ar-ai» jastar gazetiniń bas redaktory Tursynbek Sultanbek «Aqparat salasynyń úzdigi» tósbelgisimen marapattaldy.

Taraz