Premer-Mınıstr Álıhan Smaıylovtyń tóraǵalyǵymen ótken Úkimet otyrysynda Bilim berýdi damytýdyń 2022-2026 jyldarǵa arnalǵan tujyrymdamasy bekitildi, dep habarlaıdy Egemen.kz Primeminister.kz saıtyna silteme jasap.
Oqý-aǵartý mınıstri Ashat Aımaǵambetov Tujyrymdamada kórsetilgen is-sharalar jaıly baıandady. Atap aıtqanda, mektepke deıingi tárbıeniń «oıyn arqyly oqytý» jańa modelin engizý, balabaqshalar men ortalyqtar ashý, tárbıeshilerdi qaıta daıarlaý jáne olardyń biliktiligin arttyrý boıynsha jumys jalǵasady.
Jekelegen pánder boıynsha mektep baǵdarlamalary jetildiriledi. Bul rette mektepterge kezeń-kezeńmen akademııalyq avtonomııa beriletin bolady. Sondaı-aq halyqaralyq deńgeıdegi mektepterde qorytyndy baǵalaý nátıjelerin taný boıynsha jumystar júrgizý josparlanýda. Oqý prosesin sıfrlandyrý sheńberinde birqatar joba iske asyrylady: «sıfrlyq muǵalim», shaǵyn komplektili mektepterde jekelegen pánderdi onlaın oqytý jáne derbes sıfrlyq oqýlyqtar (mobıldi qosymsha).
Budan basqa, bilim berýdegi qyzmetterdi sıfrlandyrý, oqýshy oryndarynyń jetispeýshiligin joıý, erekshe bilim berý qajettilikteri bar balalardy qoldaý, jańa fakýltatıvtik pánderdi engizý jáne mektepterde qosymsha seksııalar ashý, tehnıkalyq jáne kásiptik bilim berýdi damytý jáne t. b. jumystar jalǵasady.
Bul rette Ǵylym jáne joǵary bilim mınıstri Saıasat Nurbek pen Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın de baıandama jasady.
Baıandamashylardy tyńdaǵan Premer-Mınıstr usynylyp otyrǵan Tujyrymdama balabaqshadan bastap ýnıversıtetke deıingi oqytýdyń barlyq deńgeıinde sapaly bilim alýǵa qoljetimdilikti qamtamasyz etýge baǵyttalǵanyn atap ótti.
«Qujatta barynsha bıik maqsattardy kózdeıtin nysanaly ındıkatorlar aıqyndalǵan. 2026 jylǵa qaraı mektepke deıingi bilim berý uıymdarynyń barlyǵy tárbıe jáne oqytý sapasyn baǵalaýdyń halyqaralyq quraldaryn engizetin bolady. Ata-analar bilim berý júıesindegi «jan basyna qarjylandyrý» prınsıpi boıynsha kez kelgen bala-baqshadan oryn tańdaı alady. Sonymen qatar qujatta Balalardyń amandyǵy men ál-aýqaty ındeksin jáne ınteraktıvti kartasyn iske asyrý sharalary kózdelgen», dedi Álıhan Smaıylov.
Ol Memleket basshysynyń tapsyrmasyna sáıkes mektepterde jaıly jáne qaýipsiz orta qurý maqsatynda «Jaıly mektep» ulttyq jobasy ázirlenip jatqanyn eske saldy. Shaǵyn komplektili mektepterde bilim berý sapasyn jaqsartý úshin «Mobıldi muǵalim», «Oqý úlgerimi tómen mektepterge myqty mektepterdiń qamqorlyǵy», «Qamqor januıa» jobalary engizilýde.
Sonymen qatar 2025 jylǵa qaraı jańa qurylys standarttary boıynsha jalpy sany 840 myń orynǵa arnalǵan mektepter salý josparlanǵan.
«Tujyrymdamanyń barlyq josparlary, saıyp kelgende, balalardyń sapaly jáne jan-jaqty damýyn qamtamasyz etýi kerek. Sondyqtan balalardyń boıyndaǵy bilim nátıjesin baǵalaýdyń barlyq deńgeıde moıyndalǵan ádistemelerin engizýge erekshe nazar aýdarý qajet», dedi Premer-Mınıstr.
Onyń aıtýynsha, jastardy kásipkerlik daǵdylaryna oqytý úshin kolledjder, onyń ishinde aýyldyq kolledjder janynan shaǵyn ınnovasııalyq kásiporyndar qurylady. Bul kolledj túlekteriniń 75%-yn oqý bitirgennen keıin birden jumysqa ornalastyrýǵa múmkindik beredi. Sondaı-aq jetekshi joǵary oqý oryndaryn zertteý ýnıversıtetterine transformasııalaý júrýde, sondaı-aq bedeldi sheteldik ýnıversıtetter fılıaldarynyń sany da artady.
2026 jylǵa qaraı bakalavrlar stıpendııasynyń mólsheri 2 esege, magıstranttar men doktoranttardyń stıpendııasy 1,5 esege artady.
Álıhan Smaıylov josparlanǵan is-sharalardy iske asyrý bilim berý sapasyn jaqsartýǵa jáne Qazaqstannyń halyqaralyq bilim berý reıtıngterindegi kórsetkishterin arttyrýǵa múmkindik beretinin aıtty.
Usynylǵan Tujyrymdama daýys berý arqyly bekitilgennen keıin Premer-Mınıstr Oqý-aǵartý, Ǵylym jáne joǵary bilim mınıstrlikterine múddeli memlekettik organdarmen jáne ákimdiktermen birlesip, onyń is-sharalaryn ýaqytyly oryndaýdy qamtamasyz etýdi, sonymen qatar Tujyrymdamany «Bilimdi ult» ulttyq jobasymen, «Jaıly mektep» jobasymen úılestirý jóninde sharalar qabyldaýdy tapsyrdy.
Sıfrlyq damý, ınnovasııalar jáne aeroǵarysh ónerkásibi mınıstrligi bilim berý uıymdaryn sapaly ınternetpen qamtamasyz etý jóninde sharalar qabyldaýy qajet.