Birligi bekem bólim

Áskerı bólim 1992 jyly 21 qazanda Almatyda armııa basqar­masyna qyzmet kórsetetin derbes kúzet batalonynyń bazasynda qurylǵan. Osy 30 jyldyq tarıhynda bólimge 12 komandır basshylyq jasaǵan eken. Bólimniń tuńǵysh komandıri podpolkovnık Sergeı Arsıýtın, ekinshi komandıri polkovnık Aleksandr Sýptelıa, keıinnen áskerı ujymdy polkovnık Erken Ábdikerimov eki ret basqarǵan.

Ár jyldary bólimdi basqarǵan komandırlerdiń birqatary qazir qurmetti demalysta. Polkovnıkter Rýslan Muzdybaev, Qaırat Boztaev, Aıdar Abdrahman, Erkin Alashbekov sekildi ofıserler Qarýly Kúshterde abyroıly qyzmet atqaryp júr. Búginde áskerı bólimge podpolkov­nık Qýanysh Seıitbatqalov bas­shy­lyq jasaıdy.

1999 jyly Qorǵanys mınıstrligi men Qarýly Kúshterdiń Bas shtaby Almaty qalasynan Aqmolaǵa qonys aýdarǵanda 83205 áskerı bólimi de Arqa tósine taban tiredi. Sol tustaǵy bólim komandıri, kapıtan Erken Ábdikerimov kóshti bastap keledi. Bul almatylyqtardy jańa astana jatsyna qoıǵan joq desek te, elordaǵa túpkilikti ornyǵý ujymnyń kez kelgen múshesinen tabandylyq pen janqııarlyqty talap etken kez edi. Bólimniń shtab bastyǵy podpolkovnık Maksım Karalnyı sol tusta merzimdi qyzmetin ótep júrgen sarbaz bolatyn.

Elordaǵa alǵashqylardyń biri bolyp kelgen podpolkovnık M.Karal­nyı: «1997 jyly merzimdi qyzmetim­di óteýge Pavlodar qalalyq áskerı komıssarıatynan shaqyryldym. Bul áskerı bólimge kelip túsýimniń tarıhy qyzyq. 1992 jyly Mem­lekettik qorǵanys komıteti qu­ryl­ǵan tusta nemereles baýyrym Alekseı Borıakovti qalalyq komıssa­rıat áskerge shaqyryp, qolyna qujat­taryn ustatyp, Almatyǵa ushaq­qa otyrǵyzyp jiberedi. Asta­naǵa alǵash kelgen Alekseı qolyn­daǵy bir japyraq qaǵazǵa jazyp alǵan mekenjaı arqyly áskerı bó­limdi taýyp alady. Baqylaý ótkizý pýnk­tine kelse, kezekshilikte turǵan sar­bazdar: «Baýyrym, áskerde ne joǵalttyń, úıińe qaıt!» dep keleke etip kúlipti. Bul Keńes ókimetiniń irgesi sógilmeı turǵanda Odaqtyń ár tusynan shaqyrylǵan saqa jigit­ter eken. Alekseıdiń táýelsiz Qazaq­stan áskerindegi qyzmeti osylaı bas­talǵan.

Keıin meni de áskerge shaqyrǵanda komıssarıattaǵylarǵa 83205 áskerı bólimine jiberý týraly ótinish aıttym. Sáıkestik shyǵar, sol joly osy bólimge komanda jasaqtalyp jatyr eken. Sóıtip, araǵa 3 jyl salyp, Alekseı baýyrym qyzmet ótker­gen ujymǵa kelip tústim», dep esine aldy.

Maksım Vıtalevıchtiń taǵdy­ryna áskerı bólimniń elordaǵa konys aýdarý mıssııasyna qatysý jazylypty. 1999 jyly alǵashqylardyń biri bolyp, jańa astanaǵa kóship kelgen ol sol tustaǵy Qorǵanys mınıstrligi Kadrlar departamentiniń bastyǵy general-ma­ıor Sábıt Taýlanov­tyń júrgizýshisi bolady. Merzimdi qyzmeti aıaqtalǵan soń ol áskerı bólimge Qarýly Kúshterdiń qyzmet­keri bolyp jumysqa ornalas­ty. 2001 jyly kelisimshart boıynsha áskerı qyzmetke shaqyryldy. 21 jyldyq qyzmet ótilinde syrttaı oqyp, joǵary bilim alýǵa da úlgerdi.

Áskerı polısııa jasaǵynda, Gvar­deısk garnızonynda, Áskerlerdi páterlerge ornalastyrý bas basqar­masynda birqatar qyzmetter atqar­dy. Áskerı ómiri qatardaǵy jaýyngerden bastalǵan Maksım Vıta­levıch búginde komandırdiń birinshi orynbasary – shtab bastyǵy laýazymyn abyroımen atqaryp júrgen azamat.

Áskerı bólimniń jeke quramy al­ǵashqy kúnnen joǵarǵy qolbas­shy­­lyqtyń qoıǵan tapsyrmala­ryn múl­tiksiz oryndap keledi. Eli­­mizde ótken bir­qatar keń kó­lem­­di halyqaralyq oqý-jat­ty­ǵý­­larǵa qatysyp, tájirıbe shyń­­dap júr. Bul jóninde shtab bas­tyǵy: «Bıylǵy qyrkúıek aıynda ót­ken «Aıbalta-2022» oqý-jattyǵýla­ry­nyń sheshýshi kezeńine Qorǵanys mınıstr­liginiń jyljymaly komandalyq pýnkti qatysyp, áskerlerdi basqarýdy saýatty úıles­tire bildi», deıdi.

Aıtsa aıtqandaı, áskerı bólim­de jaýyngerlik oqý jylynyń ár kezeńinde tolyq quramda áskerı tehnıkamen marsh jasap, dalalyq komandalyq pýnkti jaýyngerlik daıarlyq ótkizip turady. Onda Qor­ǵanys mınıstrliginiń dalalyq koman­dalyq pýnktin, onyń ázirligi men múmkindikteri tekserilip, jedel toptardyń jumysy baǵalanady. Ortalyq Azııa óńirinde teńdesi joq bul shtabtyq mashınalardyń tórt modýldi kesheni Qazaqstan armııasynyń sapyna 2012 jyly kelip túskenin atap ótken jón. Al avtomobılder marshyn oryn­daýdaǵy mindetterdiń biri – áskerı qyzmetshilerdiń áskerı tehnıka júr­gizý daǵdysyn jetildirý.

Budan ózge bólimniń materıaldyq-tehnıkalyq qamtamasyz etý rotasy Qorǵanys mınıstrligin, sondaı-aq Aq­mola óńirlik garnızonyna qarasty bir­qatar áskerı bólimdi kıim-keshek, azyq-túlikpen qamtamasyz etip otyrady.

– Qorǵanys mınıstrliginiń bas­shylyq quramy men qurylymdyq bólim­she basshylaryn qyzmettik kó­likpen qamtamasyz etý bizdiń bólimniń mindetine kiredi, – deıdi podpolokovnık Maksım Karalnyı. – Elimizge issaparmen keletin sheteldik áskerı delegasııany alyp júretin kólikter halyqaralyq deńgeıdegi birneshe is-sharalarǵa qatysty. Jeke quramnyń eńbegi Qorǵanys mınıstrliginiń bas­shylyǵy tarapynan da, meımandar tarapynan da únemi joǵary baǵa alyp, kótermelenip keledi.

Memlekettik merekelerdiń qur­metine ótkiziletin áskerı sherý­lerge 83205 áskerı bóliminiń avtokólik tehnıkalary da qatysyp júr. Onyń ishinde paradtyq kabrıolet kó­likterine arnaıy toqtalyp ótken jón. Almaty men Astana jurt­shy­lyǵyna 2000-jyldardyń basyna deıingi ótken áskerı sherýlerden Gaz «Chaıka» paradtyq kabrıoletteri ta­nys bolýy múmkin. Qazir onyń bi­reýi Qarýly Kúshterdiń áskerı-ta­rıhı mýzeıindegi jádigerler qata­ryn to­lyqtyryp tursa, endi birin 83205 áskerı bóliminiń avto­parkinen kórýge bolady. Sońǵy jyldardaǵy sherýler­ge jańa eki «Lınkoln» paradtyq kab­rıoleti qatysyp júr. Sonymen birge kún­delikti qyzmette qoldanylatyn Qa­rý­ly Kúshterdiń mórleri men mór­tań­balary da qamtamasyz etý bóli­minde ázirlenetinin ekiniń biri bile bermeıdi.

Ujymda áskerı tártipti nyǵaıtý, oń moraldyq-psıhologııalyq ahýaldy qalyptastyrý men qoldaý baǵy­tyndaǵy jumystar júıeli túr­de júrgizilip turady. Jaǵymdy psı­hologııalyq ahýal jetistikke jetý­diń tıimdi tásili dep biletin jeke quramnyń urany – «Jetkizemiz, je­ńemiz!» Bul – el ıgiligi men qor­ǵanys qabiletin nyǵaıtý jolynda eń­bek etip júrgen áskerılerdiń óz min­detterin oryndaýdaǵy senimdiliktiń belgisi bolsa kerek.