Astanalyq áýe bazasynyń áskerı ushqyshtary aman qalý kýrsynan ótti. Alpystan astam áskerı qyzmetshi ómir súrý negizderi boıynsha praktıkalyq sabaqtarǵa qatysty. Olardyń qatarynda qutqarý-izdestirý komandalary, ushýdy basqarý toby, ushý jáne ınjenerlik-tehnıkalyq quram, medısınalyq qyzmet mamandary, sondaı-aq bólim psıhologi bar.
Kýrstyń negizgi mindeti – apatqa ushyraǵan áýe kemesiniń ekıpajyna kómek kórsetýdegi jeke quramnyń daǵdylary men mashyǵyn jetildirý. Odan bólek zardap shekkenderge alǵashqy medısınalyq kómek kórsetý jáne olardy evakýasııalaý máseleleri de pysyqtaldy. Ekıpaj músheleri jaralylardyń jarasyn tazartyp tańý, tasymaldaý daǵdylaryn jetildirdi. Aman qalýdy oqytýdyń mańyzdy baǵyty – áýe kemesiniń ornalasqan jerin anyqtaý kezinde topografııalyq baǵdarlaý negizderin qaıtalaý, áskerı qyzmetshilerdiń avıasııalyq apattyq izdestirýde basshylyqpen baılanys úshin ýltra qysqa tolqyndy radıostansany paıdalaný.
– Bul daǵdylardyń bárin tek ushý quramy ǵana emes, ekıpajdyń árbir múshesi meńgerýi qajet. Sabaq barysynda jeke quram toptarǵa bólindi. Aman qalý boıynsha jattyǵýlar jarys rejiminde ótkizildi. О́ıtkeni dál osy ádis shtattan tys jaǵdaı týyndaǵan kezde praktıkalyq daǵdylardy qoldanýda jaqsy nátıje beredi, – dep túsindirdi elordalyq avıasııalyq baza komandıriniń ushý qaýipsizdigi jónindegi orynbasary, podpolkovnık Talǵat Turǵambaev.
Aman qalý – avıasııalyq bólimshelerdiń jeke quramyn daıyndaýdaǵy mańyzdy elementterdiń biri. Mundaı keshendi jattyǵýlar júıeli túrde júrgizilip, áskerı qyzmetshilerdi ártúrli meteojaǵdaılardaǵy yqtımal daǵdarystyq jaǵdaılarǵa daıyndaýǵa kómektesedi.