ASTANA. 27 mamyr. Eýrazııalyq ekonomıkalyq odaqqa qatysýshy elder arasynda 2019 jyldyń 1 shildesine deıin ortaq elektr energetıkasy naryǵyn qurý týraly kelisimge qol qoıylady. Indýstrııa jáne jańa tehnologııalar vıse-mınıstri Baqytjan Jaqsalıev osylaı dep málimdedi. Bul týraly Bnews.kz habarlady.
Vıse-mınıstrdiń aıtýynsha, qazirgi ýaqytta Keden odaǵy men Biryńǵaı ekonomıkalyq keńistik kóleminde elektr energetıkasy salasynda yqpaldasý úderisteri júrgizilýde.
Qazaqstan, Reseı jáne Belarýs memleketteriniń arasynda elektr energetıkasy salasy boıynsha burynnan qalyptasqan úrdis bar. Biraq, bul úsh el úshin ortaq elektr energetıkasy naryǵy jóninde sóz qozǵaý áli erte. О́ıtkeni, elektr energetıkasy naryqtarynyń modelderi ártúrli.
Baqytjan Jaqsalıev: «Qazaqstanda yryqtandyrylǵan elektr naryǵy bolsa, Belarýste memlekettik satylas biriktirilgen kompanııa, al Reseıde elektr energııasy men qýattar naryǵy torapty baǵany belgileıdi. Bir jyldyń ishinde sarapshylar elektr energetıkasy salasyndaǵy máselelerdi qarastyrdy. Qatarlas jumys isteıtin elektr energetıkasy júıeleriniń negizinde odaqtyń ortaq elektr energetıkasy naryǵyn kezeń-kezeńmen qurý boıynsha qol jetkizilgen kelisimder, ustanymdardyń barlyǵy kelisildi», – dedi.
Sondaı-aq, ol 2015 jyldyń 1shildesine deıin ortaq elektr energetıkasy naryǵyn qurý tujyrymdamasy ázirlenetinin, al 2016 jyldyń 1shildesine deıin ortaq naryqty qurý jóninde baǵdarlama qabyldanatynyn jetkizdi.
Vıse-mınıstr: «Baǵdarlama is-sharalaryn iske asyrýdy aıaqtaǵannan keıin odaqqa múshe memleketter 2019 jyldyń 1 shildesine deıin ortaq elektr energetıkasy naryǵyn qurý týraly halyqaralyq kelisimge qol qoıady. Onda jelilerdi qoldanýdyń biryńǵaı erejeleri de qarastyrylady», – dedi.
Joldybaı Bazar.
Derekkóz: Bnews.kz.
Foto: gazeta.kz.