ASTANA. 27 mamyr. Pavlodar oblysy men Reseı arasyndaǵy saýda kólemi bıyl 2 esege ósip otyr. Bul týraly QR Prezıdenti janyndaǵy Ortalyq kommýnıkasııalar qyzmetinde ótken brıfıngte Pavlodar oblysy ákiminiń birinshi orynbasary Dúısenbaı Turǵanov málimdedi.
Aımaq basshysynyń birinshi orynbasary «Eýrazııalyq ıntegrasııa aıasyndaǵy óńiraralyq ózara is-qımyl máseleleri» taqyrybyna arnalǵan bul basqosýda munyń oblys úshin tıimdi jaqtaryna toqtaldy. «Biz Reseı men Belarýsten taýardy satyp alǵannan góri, olarǵa satatyn taýarymyz basym. Bizdiń negizgi saýda seriktesimiz – Reseı. Bul elmen saýda kólemi úsh jylda eki ese ósken. О́tken jyly ol 3 mlrd. dollar shamasynda boldy. Bizdiń óńirge mashına jasaý, hımııa, metallýrgııa, qurylys materıaldary, azyq-túlik jáne halyqtyq tutyný taýarlary jetkizeledi. Eksport boıynsha negizgi taýarlar – alıýmınıı, elektr energııasy, kómir jáne ózge de birqatar taýarlar. Sońǵy jyldary Reseıge jetkiziletin elektr energııasynyń kólemi artty. Eger 2009 jyly 800 mln. kVt.saǵat bolsa, ótken jyly bul kórsetkish 2,5 mlrd. kVt.saǵatqa jetti», - dedi ol.
Budan bólek, kómirdiń jyldyq eksporty 16 mln. tonnadan 24 mln. tonnaǵa deıin ósken.
Murat Aıtqoja.
Derekkóz: Primeminister.kz.
Foto: forbes.kz.