Senat depýtattary «Qazaqstan Respýblıkasynyń Konstıtýsııalyq soty týraly» zańdy qabyldady, dep habarlaıdy Egemen.kz.
Palatanyń jalpy otyrysynda zań jobasyn tanystyrý kezinde senator Andreı Lýkın atap ótkendeı, qujat Memleket basshysy bastaǵan konstıtýsııalyq reformalardy júzege asyrýǵa baǵyttalǵan.
«Konstıtýsııalyq zań jobasynyń maqsaty - Qazaqstan Respýblıkasynyń Konstıtýsııasyna Konstıtýsııalyq Keńesti Konstıtýsııalyq Sotqa aınaldyrý, memlekettiń adam quqyqtaryn qorǵaý ınstıtýttaryn nyǵaıtý, Qazaqstan Respýblıkasy Konstıtýsııasynyń normalarynyń múltiksiz saqtalýyn qamtamasyz etý bóliginde Qazaqstan Respýblıkasynyń Konstıtýsııasyna engizilgen ózgeristerdi iske asyrý. Negizgi zań jáne azamattardyń konstıtýsııalyq baqylaýǵa qoljetimdiligin keńeıtý», dep túsindirdi Andreı Lýkın.
Konstıtýsııalyq zań jobasy Konstıtýsııalyq Sotty qurý men onyń qyzmetine, sondaı-aq konstıtýsııalyq sot isin júrgizýdi júzege asyrýǵa baılanysty qoǵamdyq qatynastardy retteıdi.
«Konstıtýsııalyq zańnyń qabyldanýy quqyqtyq júıeni Konstıtýsııaǵa sáıkes damytýǵa, eldegi azamattardyń konstıtýsııalyq quqyqtary men zańdylyq júıesin qorǵaý kepildikterin nyǵaıtýǵa, halyqtyń memleketke degen senimin arttyrýǵa yqpal etedi», dep qosty senator.
Konstıtýsııalyq zańnama, sot júıesi jáne quqyq qorǵaý organdary komıtetiniń qorytyndysynda zańdy eki negizgi blokqa bólýge bolatyny atap ótildi:
Birinshi blok Konstıtýsııalyq Sottyń, onyń sýdıalarynyń mártebesin, olardyń kepildikteri men qamtamasyz etilýin qarastyrady.
Konstıtýsııalyq sot elimizdiń búkil aýmaǵynda Konstıtýsııanyń ústemdigin qamtamasyz etetin organ bolady.
Zań jobasynda:
- Konstıtýsııalyq Sottyń sýdıalaryn taǵaıyndaý jáne olardyń ókilettikterin toqtatý tártibi;
- sýdıalardyń táýelsizdigi men ımmýnıteti;
- sýdıalardy materıaldyq jáne áleýmettik qamtamasyz etý normalary;
- Konstıtýsııalyq Sottyń quzyreti jáne ony júzege asyrýdyń uıymdastyrýshylyq nysandary.
Konstıtýsııalyq Sottyń quzyretine saılaýdy ótkizýdiń durystyǵyn qaraý, Parlament qabyldaǵan zańdar men halyqaralyq sharttardy olardyń Konstıtýsııaǵa sáıkestigin qaraý, sondaı-aq Konstıtýsııa normalaryna resmı túsinikteme berý kiredi.
Konstıtýsııalyq Sot azamattardyń ótinishteri boıynsha olardyń quqyqtary men bostandyqtaryn tikeleı qozǵaıtyn normatıvtik quqyqtyq aktilerdiń Konstıtýsııaǵa sáıkestigin qaraıdy.
Sondaı-aq Bas Prokýror men Adam quqyqtary jónindegi ýákil Konstıtýsııalyq Sotqa shaǵymdaný quqyǵyn aldy.
Ekinshi blok konstıtýsııalyq sot isin júrgizý tártibin qarastyrady.
Zań jobasy mynalardy anyqtaıdy:
- konstıtýsııalyq sot isin júrgizýdiń jalpy sharttary men prınsıpterin;
- Konstıtýsııalyq Sotqa júginý túrleri, olardyń nysany men mazmuny;
- Azamattardyń ótinishteriniń qabyldaný krıterııleri.