Senat Tóraǵasy Máýlen Áshimbaev Memleket basshysy qol qoıǵan zańdarǵa qatysty áleýmettik jelilerdegi paraqshasynda pikir bildirdi, dep habarlaıdy Egemen.kz.
«Búgin Memleket basshysy Qasym-Jomart Kemeluly Toqaev maýsym aıynda ótken respýblıkalyq referendýmnyń nátıjesin iske asyrý úshin qabyldanǵan birqatar zańǵa jarııa túrde qol qoıdy. Olardyń qatarynda «Konstıtýsııalyq Sot týraly», «Adam quqyqtary jónindegi ýákil týraly», «Prokýratýra týraly» sııaqty konstıtýsııalyq zańdar bar», dep jazdy Senat Tóraǵasy.
Osylaısha bılik tarmaqtary arasyndaǵy baılanystyń jańa úlgisin qalyptastyrýǵa jáne memleket basqarý isine azamattardyń qatysýyna jol ashýǵa múmkindikter týyp otyr. Sondaı-aq adam quqyqtary men bostandyqtaryn qorǵaý júıesi nyǵaıa túskenin atap ótti.
«Prezıdentimiz atap ótkendeı, konstıtýsııalyq reforma Qazaqstan tarıhynda jańa dáýir bastalǵanyn aıqyndaıdy. Bul qadamdar sońǵy úsh jyldaǵy saıası ózgeristerdi ornyqtyryp, memleketimizdi odan ári nyǵaıtý úshin myqty negiz qalady. Shyn máninde, búgin qol qoıylǵan zańdar Ádiletti Qazaqstan qurýdyń berik quqyqtyq irgetasy ekeni sózsiz. Aldaǵy ýaqytta Parlament Senaty ádilettilik qaǵıdatyna taban tireı otyryp, zańnamalyq jumystardy jalǵastyra beredi», dedi Máýlen Áshimbaev.