Sharaına
Máskeý qalasynda jýrnalıst Anna Polıtkovskaıanyń ólimine qatysty sot otyrysy ótip jatyr. Prokýror sottan aıyptalýshylardy 15 jyl merzimnen ómir boıy túrmede otyrǵyzý jazasyn surady. Memlekettik aıyptaýshy Polıtkovskaıany óltirýdi uıymdastyrǵany úshin Gaıtýkaev pen Máskeý qalasy ishki ister basqarmasynyń qyzmetkeri Hadjıkýrbanovty tıisinshe birin ómir boıy bas bostandyǵynan aıyrýdy, al ekinshisin 22 jyl túrmede otyrǵyzý jazasyna kesýdi surady. Prokýror, sondaı-aq, óltirýdi uıymdastyrǵandar jazalaryn qatań rejimdegi kolonııada óteýleri tıis dep esepteıdi. Polıtkovskaıa 2006 jyldyń 7 qazanynda óz úıiniń kireberisinde kıller oǵynan qaza tapqan edi. Belgisiz merzimge shegerýdi usyndy Sırııalyq oppozısııa prezıdenttik saılaýdy belgisiz merzimge shegerýdi usyndy. Muny oppozısııa ókilderiniń biri – Kadrı Djamıl Máskeý qalasynda ótkizgen baspasóz máslıhatynda málimdedi. Onyń aıtýynsha, saılaýshylardyń kópshiligi daýys berýge qatysa almaıdy. Sondaı-aq, ol oppozısııa «prezıdenttik saılaýǵa baıkot jarııalaýǵa shaqyryp otyrǵan joq» dep atap ótken. Bul elde saılaý 3 maýsymǵa belgilengen. Bashar Asadqa negizgi básekeles retinde eki saıasatkerdiń aty-jóni atalady. Biri – 43 jastaǵy allepolyq kommýnıst ári depýtat Maher Abdel Hafız Hadjar, ekinshisi – eldiń burynǵy mınıstri 54 jastaǵy Hassan Abdel Illıahı an-Nýrı. Týrısterdi osylaı tartsa kerek Tarıhta alǵash ret asa mol kólemdegi týrıstik top Qytaıdan Los-Andjeles qalasyna keldi. Quramy alty myń adamnan turatyn topty osynda jetkizý úshin 70 avıareıs qajet bolǵan. Týrıstermen kezdesý aldynda bir saýda ortalyǵynda qyzyl tústi tósenish tóselipti. Týrıster júzge jýyq shaǵyn toptarǵa bólingen jáne ár toptyń óz baǵdarlamalary bar kórinedi. Bul týrıstik toptyń kelýin «Perfekt» degen saýda kompanııasy uıymdastyrǵan. Ári osy kompanııa týrısterdiń bar shyǵynyn kótergen. AQSh saýda departamentiniń málimetteri boıynsha, ótken jyly AQSh-ta 1,8 mıllıonnan astam qytaılyq bolǵan eken. Olardyń árqaısysy orta eseppen 10 myń dollardaı qarjy qaldyrypty. Qarjylyq alaıaqtyqty moıyndady Fransııanyń oppozısııalyq «Halyq qozǵalysy odaǵy úshin» partııasyna 2012 jylǵy prezıdenttik saılaýda Nıkolıa Sarkozıdiń saılaý kampanııasy kezinde qarjylyq alaıaqtyq jasady degen aıyp taǵylyp otyr. ITAR-TASS agenttiginiń habarlaýynsha, dúısenbi kúni partııanyń shtab-páterine tintý júrgizilgen. «Kampanııanyń 11 mıllıon dollarǵa jýyq qarajaty basqa maqsatqa jumsaldy» dep málimdedi Jerom Pavrııe. Bul adam saılaý naýqany kezinde Sarkozıdiń saılaýaldy shtaby jetekshisiniń orynbasary bolǵan eken. Onyń aıtýynsha, bul máselelerden Sarkozı men partııanyń qazirgi basshysy Jan-Fransýa Kole habarsyz bolǵan. Sondyqtan J.Lavrııe alaıaqtyqqa qatysty máseleni óz jaýapkershiligine alyp otyr. Olardy advokaty Patrık Mezonnevtiń sózine qaraǵanda, bul «ekonomıkalyq bopsalaý bolyp tabylady». Qaı jerde ekenderi anyqtaldy Nıgerııa qorǵanys shtabynyń basshysy Aleks Badeh eldiń qarýly kúshterine urlanǵan oqýshy qyzdardyń qaı jerde ekendigi belgili bolǵanyn málimdedi. Biraq, ony ataýdan bas tartty. El bıligi tutqyndaǵy qyzdardy qutqarýǵa qazirshe kirise almaı otyr. Sebebi, qutqarý operasııasy barysynda sodyrlar kepilge alynǵandardy óltirip tastaýy múmkin. «Boko haram» terrorlyq uıymy osy jyldyń 14 sáýirinde Shıbok qalasyndaǵy mektepke shabýyl jasap, sodyrlar 276 qyzdy urlap ketken edi. Terrorshylar olardy quldyqqa satamyz dep qorqytqan da bolatyn. Derek kózderine qaraǵanda, eki jaq kepildegi 50 qyzdy «Boko haram» uıymynyń qamaýdaǵy 100 múshesine aıyrbastaýǵa kelisken sııaqty. Nıgerııa úkimeti bul málimdemeden bas tartyp otyr. Onyń sebebi belgisiz. Aýyr salmaqtynyń biri qaıtys boldy 2007 jyly álemdegi salmaǵy eń aýyr dep tanylǵan meksıkalyq Manýel Ýrıbe 48 jasynda ómirden ozdy. «Assosheıted press» agenttiginiń aqparaty boıynsha, ol Monterreı qalasyndaǵy aýrýhanada júrek talmasynan qaıtys bolǵan. Ýrıbeni aýrýhanaǵa kótergish krannyń kómegimen kirgizipti. Onyń artynda zaıyby Klaýdııa qaldy. Ýrıbeniń salmaǵy 2001 jyly 597 kılony tartqan eken. Dıeta ustaýdyń arqasynda ol 360 kıloǵa deıin aryqtapty. Qazirgi kezde álemdegi salmaǵy eń aýyr adam Saýd Arabııasynyń turǵyny Halıd Mohsen Shaarıden esepteledi. Onyń salmaǵy 610 kılony quraıdy.Qysqa qaıyryp aıtqanda:
*Býrıatııada anasy ulynyń qaltasynan taýyp alǵan nasybaıdy jeýge qystaǵan. Sonyń kesirinen uly ajal qushypty. * AQSh ákimshiligi kezdeısoq jaǵdaıda Ortalyq barlaý basqarmasynyń Aýǵanstandaǵy rezıdentýra bastyǵynyń jeke basyn jarııa etip qoıdy. Onyń aty-jóni Barak Obamanyń Aýǵanstanǵa sapary barysyndaǵy is-sharalarǵa qatysatyn 15 adamnyń tizimine kirgizilgen eken. *Sırııa aýmaǵynda urlanǵan hımııalyq qarýǵa tyıym salý jónindegi uıym mıssııasynyń qyzmetkerleri bosatyldy. Qazir olar ózderiniń bazasyna oraldy. *Reseılik bıznesmen Anton Zıngarevıch «Redıng» fýtbol klýbynyń baqylaý paketi aksııalaryn satýǵa qoıý jóninde sheshim qabyldady. Ol, sondaı-aq, aksııalardy nebári bir fýntqa satýǵa daıyn ekenin málimdedi.Internet materıaldary negizinde ázirlendi.