Kásipkerler sybaılas jemqorlyqtan qorǵalýy tıis

Astanada Parlament Májilisiniń depýtaty, «Nur Otan» fraksııasynyń múshesi Qaıyrbek Súleımenovtiń tóraǵalyǵymen Respýblıkalyq jemqorlyqqa qarsy is-áreket jónindegi qoǵamdyq keńestiń otyrysy bolyp ótti. Is-shara barysynda RJQK músheleri Shyǵys Qazaqstan oblysyndaǵy kásipkerlerdi sybaılas jemqorlyqtan qorǵaý máselelerin talqylady. Qazaqstan, Reseı jáne Belarýs elderi Eýrazııalyq ekonomıkalyq odaq qurýdyń aldynda turǵanda sybaılas jemqorlyqtan qorǵaý jáne otandyq bıznestiń básekege qabilettiligin qamtamasyz etý máselesiniń ózektiligi burynǵydan da arta tústi. Ásirese, munyń negizgi qyzmeti Reseı Federasııasynyń aýmaǵynda ótip jatqan kásip­ker­lerge qatty qatysy bar. Ashyq aımaq jaǵdaıynda bız­nestiń básekege ıkemdele alýyna jaǵdaı jasaý partııa men búkil qoǵamnyń mindeti bolyp tabylady. Zor óndiristik áleýeti bar Shy­ǵys Qazaqstan oblysy Keden odaǵyndaǵy áriptes-elderdiń kompanııalarymen tyǵyz qarym-qa­tynas ornatqan. Qoǵamdyq keńestiń saraptama toby Shyǵys Qazaqstan oblysyna sapary barysynda aımaqtaǵy 120-dan astam bıznes ókilderimen kezdesý ótkizip, aımaqta kásipkerlerdi sybaılas jemqorlyqtan qor­ǵaý­dyń jaı-kúıin tekserdi. Otyrysta Qoǵamdyq keńestiń múshesi, Ulttyq kásipkerler pala­tasynyń kásipkerlerdiń quqyq­taryn qorǵaý jónindegi keńestiń hatshysy Ǵalymjan Qanatbekov jemqorlyq quqyq buzýshylyqtyń ósýiniń jaǵymsyz úrdisin atap kórsetti. Bul bir jaǵynan quqyq fak­tilerin tirkeýdiń jolǵa qoıyl­maǵanyna da baılanysty, dedi ol. Onyń aqparaty boıynsha, aımaqta para alý 2009 jyl men 2011 jyl aralyǵynda 2 ese ósken, al 2012 jyly azdap tó­men­degenimen, 2013 jyldyń qorytyndysy boıynsha taǵy da óse bastaǵan. Sondaı-aq, memlekettik satyp alýdy júzege asyrǵan kezde jemqorlyq kórinisteriniń ósýi baıqalypty. Kásipkerlikti qorǵaý maq­satynda 2011 jyldan bastap 2014 jylǵy I toqsan aralyǵynda pro­kýratýra organdary 190 tek­serý júrgizdi, bul rette 2,3 myńnan asa zań buzýshylyqtar anyqtaldy, olardy joıý úshin 200-den asa qarsylyqtar men usynystar engizildi. Máselen, olardy qaraý nátıjeleri boıynsha memlekettik organdardyń 230-dan astam laýazymdy adamdary, onyń ishinde 30 jemqorlyq quqyq buzýshylyq úshin tártiptik jaýapkershilikke tartyldy. Tártiptik jaýapkershilikke tar­tyl­ǵandardyń sany boıynsha jergilikti ákimdikter men ishki ister organdarynyń qyzmetkerleri kósh bastap tur. Otyrystyń nátıjeleri boıynsha qaýly qabyldandy, onda kásipkerlikti jemqorlyqtan qorǵaý tıimdiligin arttyrýǵa baǵyttalǵan múddeli qurylymdarǵa arnalǵan naqty usynymdar baıandalǵan. «Egemen-aqparat».