Qazaqstan Respýblıkasy prezıdenttigine Jalpyulttyq sosıal-demokratııalyq partııasy atynan úmitker Nurlan Áýesbaev respýblıkalyq saılaýaldy shtabtyń uıymdastyrýymen tyǵyz qurylysqa qarsy beıbit mıtıngke qatysty.
Is-shara elordada Pýshkın kóshesi men Sh.Qudaıberdiuly dańǵyly qıylysynda ornalasqan saıabaq aýmaǵynda ótti. Aksııa barysynda sóz sóılegen úmitker tyǵyz qurylys máselesi tek elorda jáne Almaty qalasymen shektelmeıtindigin atap ótti. Bul – Qazaqstannyń barlyq derlik qalasyna ortaq másele.
Nurlan Áýesbaevtyń pikirinshe, tyǵyz qurylys qala qasiretine aınalýda. Qurylys kompanııalaryna eń jaqsy jer telimderiniń beriletini jasyryn emes. Oǵan qosa ákimdikter mundaı kompanııalarǵa bas jospar boıynsha mektep, balabaqsha men aýrýhanalar salynýǵa tıis jerlerdi berýde. Sonyń saldarynan turǵyndar áleýmettik ınfraqurylymnyń joqtyǵynan zardap shegip otyr.
Qoǵam aldynda turǵan taǵy bir másele – sybaılas jemqorlyq. N.Áýesbaevtyń aıtýynsha, qurylys kompanııalary óz múddelerin ǵana oılap, eń jaqsy jer telimderin ıelenýge umtylady. Mundaı jaǵdaılarda ádette para beriledi. Kandıdattyń pikirinshe, jaǵdaıdy barlyq deńgeıdegi ákimderdi tikeleı saılaýdy engizý arqyly ǵana ózgertýge bolady. Qala basshylary halyq aldyndaǵy jaýapkershilikterin sezinbeıinshe, jemqorlyqty jeńý múmkin emes.
Beıbit mıtıngke 50-ge jýyq adam, onyń ishinde elordadaǵy tyǵyz qurylysqa qarsy belsendiler qatysty.