Bul týraly Memleket basshysy Qasym-Jomart Toqaev Atyraý oblysy jurtshylyǵymen kezdesýinde aıtty, dep jazady Egemen.kz.
«Qazmunaıgazǵa» ekologııalyq qaýipsizdik talaptaryn saqtaı otyryp, Atyraý jerinde úlken munaı qoımasyn salý máselesin qarastyrýdy tapsyramyn. Energetıka mınıstrligi munaı óndiretin iri kompanııalarmen qoımanyń qurylysyna qatysty kelissózder júrgizýi kerek», dedi Prezıdent.
Sondaı-aq Toqaev munaı salasyndaǵy eńbek naryǵynda shuǵyl sheshilýge tıis máseleler baryn eskertip, keleshekte jumyssyzdyqtyń paıda bolýyna jol bermeý kerektigin aıtty. Sondaı-aq Úkimetke tapsyrma berdi.
«Bul óte mańyzdy máseleni Úkimet óz nazarynda ustaýy, osy másele boıynsha negizgi shetel kompanııalarymen birge jumys isteýge tıis. Úkimetke osy sharýany shuǵyl qolǵa alýdy tapsyramyn», dedi Qasym-Jomart Kemeluly.
Memleket basshysy óńirdegi sheteldik kompanııalardyń aımaqtyń bilim berý, densaýlyq saqtaý jáne ekologııa máselelerin sheshýge atsalysýy kerektigine de toqtaldy.
«Úkimet ákimdikpen birlesip, ınvestorlardy osy jumysqa jumyldyrýy qajet. Áleýmettik jobalardyń júzege asyrylýyna basa nazar aýdarylady. Osy máseleni Prezıdent janyndaǵy Sheteldik ınvestorlar keńesiniń qaraýyna shyǵarý kerek. Memleket múddesi úshin ınvestorlarmen jalpy kelisimderdi ázirleý máselesin pysyqtaýdy tapsyramyn», dedi Prezıdent.
Prezıdent óńirde ınvestısııa tartý úshin memleket tarapynan túrli amal-tásilder qarastyrylǵanyn jetkizdi. Basqa da iri jobalardy júzege asyrý josparlanǵan. Olar ınfraqurylymdy damytýǵa, ınvestısııalar men jańa tehnologııalardy tartýǵa jol ashady. Sonymen qatar, birneshe myń jumys ornyn qurýǵa múmkindik beredi. Sol sebepti Qasym-Jomart Toqaev atalǵan jobalar óńirdiń ekonomıkasyn ártaraptandyrý úshin óte mańyzdy dep esepteıdi. Osy rette Úkimet jáne ákimdik ınvestorlarmen birlesip olardyń tezirek iske qosylýyn qamtamasyz etýdi tapsyrdy.
«Munaı qoımalaryn barynsha kóbeıtý asa ózekti másele bolyp tur. Qazir biz daıyn munaıdy birden eksportqa shyǵarýǵa májbúrmiz. О́ıtkeni, tehnologııa sondaı. О́ndiristi toqtatyp qoıýǵa bolmaıdy. Osy oraıda, Qytaıdyń jaqsy tájirıbesi bar. Olar óte úlken qoımalar salǵan. Sol sebepti, munaı bolmaı qalǵannyń ózinde ishki naryqty 3-4 aı boıy qamtamasyz etip tura alady», dedi Memleket basshysy.