ASTANA. 28 mamyr. Memleket basshysy Nursultan Nazarbaev Joǵary Eýrazııalyq ekonomıkalyq keńestiń memleket basshylary deńgeıindegi otyrysyna daıyndyq máseleleri jóninde ótkizgen keńesinde jańa odaqtyń ekonomıkalyq turǵydan ornyqty damýǵa zor serpin beretinin aıtty. Bul týraly Aqordanyń baspasóz qyzmeti habarlady.
Jıyndy ashqan Prezıdent osy aptada Eýrazııalyq ekonomıkalyq odaq qurý týraly shartqa qol qoıý josparlanyp otyrǵanyn sóz etti.
«Biz jıyrma jyl boıy ekonomıkalyq ıntegrasııa baǵytynda ilgeriledik. Osy ýaqytqa deıin orasan jumys atqaryldy. Endi sol jumysymyzdyń beker bolmaǵanyn, qol qoıylǵan sharttyń halyq ıgiligine arnalǵanyn is júzinde dáleldeýge tıispiz. Elimiz uzaqmerzimdi bolashaqqa josparlanǵan bul odaqtan paıda kóredi. Biz shartqa ekonomıkalyq turǵydan tıimdi bolǵandyqtan qol qoıýǵa umtylyp otyrmyz. Atap aıtsaq, bizdiń elimizdiń teńizge shyǵatyn joly joq ekenin eskerý kerek, muny jáne kólik ınfraqurylymyna qoljetimdilikti kórshilerimiz qamtamasyz etetin bolady», – dep atap ótti Nursultan Nazarbaev.
Memleket basshysy kórshilerimizben tyǵyz ekonomıkalyq baılanys Qazaqstannyń damýyna oń áserin tıgizetinine toqtaldy.
«Bizdiń elimizde shyǵarylǵan taýarlar Reseı men Belarýstiń naryqtarynda básekege túsýi tıis. Qazaqstan taýarlarynyń, kapıtalynyń, jumys kúshiniń erkin qozǵalysy, birlesken kásiporyndar qurý, sondaı-aq baılanystardy kúsheıtý – osynyń bári elimizdiń ekonomıkasyna paıdasyn tıgizedi», – dedi Elbasy.
Premer-Mınıstr Kárim Másimov óz baıandamasynda sharttyń jobasy Qazaqstan Prezıdentiniń tapsyrmasyna sáıkes daıyndalǵanyn jáne onda asa mańyzdy birneshe másele qamtylǵanyn málimdedi.
«Odaq bizdiń elimizge qazirgideı týrbýlentti ekonomıka jaǵdaıynda turaqty ári ornyqty damý úshin zor ekonomıkalyq múmkindikter beredi. Bul shartta kópvektorly saıasat júrgizý múmkindigi qarastyrylǵan. Osy odaqqa qatysýdan bólek, biz DSU-ǵa kirý jónindegi kelissózderdi jáne ózge de halyqaralyq birlestiktermen kelisimder jasaýdy jalǵastyramyz», – dedi Premer-Mınıstr.
K.Másimov jalpy qujattyń 4 bólikten, 28 bólimnen, 118 baptan jáne 32 qosymshadan turatynyn da atap ótti.
Premer-Mınıstrdiń birinshi orynbasary Baqytjan Saǵyntaev búgingi tańda Úkimettiń tıisti qaýlysyn kelisimdeý men qabyldaýdyń memleketishilik rásimderi aıaqtalǵanyn málimdedi.
«Shart jobasy táýelsiz sarapshylardyń saraptamasynan ótti. Sizdiń ustanymyńyz ben tapsyrmalaryńyzdy basshylyqqa ala otyryp, shart jobasymen jumys barysynda ekonomıkalyq emes erejeler alynyp tastaldy. Kelissózder barysynda biz odaqty saıasılandyrýǵa jáne onyń aıasynda ulttyq ókilettilik pen memlekettik egemendik máselelerin talqylaýǵa bolmaıtyndyǵy týraly ustanymdy qorǵap qaldyq. Sizdiń nusqaýlaryńyz ben tapsyrmalaryńyz júzege asyrylǵanyn, shart jobasy taraptarmen kelisilip, qol qoıýǵa daıyn ekenin taǵy bir ret atap ótkim keledi», – dedi ol.
Syrtqy ister mınıstri Erlan Ydyrysov shart jobasynyń ınstıtýsıonaldyq bóliginde egemendikti, aýmaqtyq tutastyqty, árbir múshe-memlekettiń saıası qurylymynyń ereksheligin qurmetteý, sondaı-aq sheshim qabyldaýdaǵy konsensýs qaǵıdattary qarastyrylǵanyna salmaq saldy.
«Odaq organdarynda múshe-memleketter ókilderiniń konkýrstyq negizde teń bolýy qamtamasyz etildi. Bul sharttyń ózge halyqaralyq sharttardy jasaýǵa kedergi keltirmeıtini aıryqsha mańyzdy. Instıtýsıonaldyq bólikte týyndaǵan barlyq túıtkilder joıyldy», – dedi vedomstvo basshysy.
Sáken Maılybaı.
Derekkóz: Aqorda saıty.
Foto: Aqorda saıty.