Semınar-konferensııaǵa Astana qalasyndaǵy mektep ustazdarymen qosa respýblıkanyń basqa da óńirlerinen kelgen muǵalimder men oqýlyq avtorlary qatysty. Bul basqosýda kóterilgen máselelerdiń árqaısysy eshkimdi beıjaı qaldyrmady. Atalǵan bilim ordasynyń dırektory Álııa Seksenova oqýshylardyń tehnologııalyq aqparat quraldaryn sheber ıgere otyryp, taǵlymy men tanymy mol kitap pen baspasóz betterindegi qundy dúnıelerdi de oqý kerektigin aıta kele, “Qazirgi zaman jańa aqparattyq tolqynnyń, jańa tehnologııanyń, jańa serpinniń zamany. Sondyqtan da balalardyń jan-jaqty bilim alýyna, bilimderin jetildirýine jaǵdaı jasaýymyz kerek. Oqýshylarǵa talap qoıa bilgen ustaz ǵana óz jumysynyń jemisine, shákirtiniń jeńisine kýá bola alady. Jas urpaqtyń bilim deńgeıi tikeleı oqýlyqtyń sapasymen baılanysty. Sońǵy jyldarda oqýlyqtar júıesin bir arnaǵa keltirip, ony jetildirýge memleket tarapynan da qatań baqylaýdyń bolyp jatqany belgili. Sol sebepti de jumyla kótergen júk jeńil demekshi, bárimiz de bilim berý salasynyń jaqsarýyna, oqýlyq máselesiniń ońtaıly sheshilýine at salysýymyz qajet. Osynda otyrǵan árbir ustazdyń da, oqýlyq avtorlarynyń da jaýapkershiligi aýyr”,–dedi óz sózinde.
Al oqýlyqtardyń mektep qabyrǵasynda nendeı dárejede baǵalanyp jatqany týraly “Almaty kitap” baspasynyń vıse-prezıdenti Bıbihan Shakıeva: “Egemendik alǵan 20 jyldyń ishinde ulttyq oqýlyqtardy jazý jáne onyń avtorlary qalyptasty dep aıtýymyzǵa bolady. Alǵashqy tól oqýlyqtarymyzdy jazýǵa “Atamura” baspasy zor eńbek sińirgenin jaqsy bilemiz. Árıne, bastapqyda qazaq tilinde oqýlyqtar jazý óte qıynǵa túskeni belgili. Kóptegen jyldar boıy Reseıdiń aýdarma oqýlyqtaryn oqyp kelgenimiz de jasyryn emes. Minekı, osyndaı qıyndyqtarǵa qaramastan “Atamura” baspasy ózderine tıesili mindetterin óte sátti oryndap shyqty. Oqýlyq salasynda balamaly oqýlyqtarǵa den qoıý óte durys. Sebebi, básekelestik bolǵan jaǵdaıda ǵana sapa bolady”, – dep óz oıyn qorytyndylady.
Araı ÚIRENIShBEKQYZY.