Jambyl oblysynda 10 tonna altyn keni bar jerasty sehy anyqtaldy, dep habarlaıdy Egemen.kz QR IIM resmı ınternet-resýrsyna silteme jasap.
«Moıynqum aýdanynyń polısııa qyzmetkerleri quramynda baǵaly metaly bar shıkizatty, tastardy zańsyz óńdeýmen aınalysatyn jerasty sehynyń qyzmetin toqtatty. Jeke turǵyn úıdi tekserý kezinde elektrlik untaqtaý dıirmeni, untaqtalǵan kenniń qaldyqtary, elek, magnıt, tasıtyn arbalar, kúrekter, synapty suıyqtyq, eki úlken qazandyq jáne 10 tonnaǵa jýyq altyn keni tabyldy», dep jazdy IIM resmı basylymy.
Odan bólek jalaqyǵa jumys istegen 30 jáne 58 jastaǵy eki jumysshy ustalǵan. Sondaı-aq polıseıler sehtyń ıesi bolǵan 37 jastaǵy jergilikti turǵyndy anyqtady.
Búginde QR Qylmystyq kodeksiniń 295-1-baby 1-bóligi (Baǵaly metaldar men asyl tastardyń, quramynda baǵaly metaldar bar taýarlardyń zańsyz aınalymy) boıynsha sotqa deıingi tergeý bastaldy.