Qoǵamdyq sana ózgerdi

Keshegi ótken Dımekeń – Din­muhamed Qonaev aǵamyz Alma­tyny ómiriniń bir bólshegi retinde qabyldap ótkenine biz kýámiz. Almatynyń Qazaqstan úshin, qazaqtar úshin orny bólek. Qazaq­stan tarıhynda orny bar saıası oqı­ǵa­lardyń bárine Almaty kýá boldy.

Prezıdent Q.Toqaev Almaty sapary kezinde qańtar oqıǵalaryna aıryqsha toqtaldy, elimiz úshin synaq bolǵanyn aıtty. Eldik tutastyǵymyzǵa syrtqy kúshterdiń ár alýan jolmen aralasyp, ekonomıkalyq toptar men dinı aǵymdardyń «shaıqasy» tutastyǵymyzǵa syzat túsire jazdady. Mundaı oqıǵanyń endi qaıtalanbaıtynyna senim bildir­gen Memleket basshysy «Elimizdiń altyn besigi – Almatyny qıratyp jat­qany osy qalanyń perzenti retinde meniń de janyma batty. Degenmen, dál sol sátte abdy­rap, ýaqyt uttyrýǵa esh qaqy­myz bolǵan joq» dep júrek túk­pirinde qordalanyp qalǵan syryn almatylyqtarmen bó­listi.

Qala ekonomıkasyn ártarap­tandyrý arqyly onyń turaqty damýyn qamtamasyz etý qajet ekenin, Almatynyń elimizdiń eko­no­mıkalyq damýynyń qozǵaýshy kúshi jáne kóshbasshysy bolyp qala beretini Memleket basshy­synyń nazarynan tys qalma­dy. Almaty turǵyndarynyń kóp­shiligi, ásirese jastar úshin baspana – eń ózekti másele. Jastardyń baspana alýyna jan-jaqty jaǵdaı jasaý kerektigi de aıtyldy.

Memleket basshysynyń bıznes, qarjy ortalyǵynda ómir súretin alma­tylyqtardy ortasha tabys tuzaǵynda dep sıpattaýy ózge basshylarǵa oı salsa deımin. Qazaqtyń bir azamaty retinde aıtarym, oblysty neme­se aýdandardy basqaryp otyr­ǵan ákimderdiń qyzmetiniń kórset­kishin turǵyndarynyń ortasha tabysy, jumysqa ornalasý kórset­kishimen baǵalaý júıesi engizil­gende ǵana qazaq­standyqtar ortasha tabys tuzaǵynan qutyla alady.

Qala halqynyń mádenı men­ta­lıtetin qalyptastyrý damýdyń mańyzdy kórsetkishi ekenin, BAQ rýhanııattyń barometri bolyp tanylǵan mádenıet taqyrybyna basymdyq berýi kerek degendi talaıdan beri aıtyp kelemin. El basyna aýyrtpalyq túsken qıyn-qystaý kezeńder ornasa da, jalpaq jurttyń da, memle­ket basshylarynyń janynan ult­tyń zııalysy tabylady. Halyq­tyń ortasynan saıdyń tasyndaı iriktelip shyqqan azamattar saıası sheshim qabyldar kezde zııaly­synyń aldynan ótip, batasyn alady.

Memleket basshysy Alma­tynyń elimizdiń iskerlik, rýhanı, ǵylymı jáne týrıstik ortalyǵy ekenin, qalanyń damýyna, onyń tirshilikke qolaıly, jaıly bolýyna aıryqsha mán beretinin aıtty. Sondaı-aq Prezıdent ne­gizgi mádenıet oshaqtary qala­nyń «tarıhı ortalyǵynda» shoǵyr­lanyp qalǵanyna nazar aýdardy, ákimdikter qalanyń jańa aýdandarynda zamanaýı mádenı orta qalyptastyrýy kerektigin tapsyrdy.

Qazaqstanda prezıdenttik ınstıtýt­tyń qalyptasqany kóz aldy­myzda ótti. Bıliktiń je­ke adamnyń nemese jekelegen toptar­dyń qolyna shoǵyrlanýy damýǵa kedergi bolǵany, aınalyp kelgende jeke basqa tabyný­shy­lyqtyń áseriniń qandaı bolǵa­nyn bárimiz kórip otyrmyz. Mem­leket basshysynyń «Meniń túsini­gimde, Prezıdent – jaldamaly me­nedjer, halyq onymen belgili bir merzimge kelisimshart jasaı­dy» degen biraýyz sózi aldaǵy ýa­qytta memleketti basqarý ıns­tı­týttarynyń múldem basqa ba­ǵytpen damıtynyn kórsetedi.

Qasym-Jomart Kemelulynyń «Bul qyz­metti atqarǵan jáne atqara­tyn árbir adam eń qatal úsh sottyń – halyq, tarıh jáne óz ar-ujdanynyń aldynda jaýap beredi» degen pikiri biraz adamǵa oı salatyn shyǵar dep úmittenemin.

Asanáli ÁShIMOV,

Memlekettik syılyqtyń laýreaty

Almaty