Bıyl mamyr aıynda Petropavl qalasyna jaqyn Qyzyljar aýdanynyń «Podgornoe» aýylynda tolyq qýatyna engende aıyna 4,5 mln dana ónim shyǵara alatyn kirpish zaýyty iske qosyldy.
«Kırpıch» SK JShS quryltaıshysy Garık Bernesıannyń aıtýyna qaraǵanda, kirpish jasaıtyn jaraqtar Ispanııanyń brendi, biraq Qytaıda qurastyrylǵan. Jańa zaýyttyń ekinshi jelisi iske qosylǵanda óndiris eki ese ulǵaıady. Zaýyt qurylysy men jaraqtandyrylýǵa 1,8 mlrd teńge ınvestısııa quıylǵan.
Bul kásiporynnyń artyqshylyǵy shıki-zaty jaqyn jerdegi ken ornynan tasymaldanady. Oblys ákimi Qumar Aqsaqalov zaýyttyń ashylý saltanatynda toǵyz qabatty úı salý úshin shamamen 1 mln 800 myń dana kirpish kerek ekenin aıta kelip, zaýyttyń bir jyldyq ónimimen ǵana 22 úı salýǵa bolatynyn jetkizdi.
«Alǵashqy kezeńde biz osy kásiporynnyń kúshimen óńirdiń kirpishke degen suranysynyń 30 paıyzyn jabamyz. Sondyqtan zaýytty salýshy kásiporynǵa memleket tarapynan óte úlken kómek berildi. Atap aıtqanda, «Soltústik» ÁKK arqyly 8 jylǵa 4 paıyzdyq ósimmen 800 mln teńge nesıe bólindi. Syrtqy ister mınıstrligi arqyly zaýyttyń jaraqtaryn keden salyǵynsyz ótkizý jóninde ınvestısııalyq kelisim jasaldy», dedi Q.Aqsaqalov.
Qazir zaýytqa bólingen 5 gektar aýmaqta jumys qyzý júrip jatyr. О́nim shıkizatty tórt túrli óńdeý tásilderinen ótkizgennen keıin ǵana daıyn bolady. Aldymen qum men balshyq arnaıy kólemde qosylady, sosyn elenedi, oǵan belgili kólemde sement pen sý qosylǵan soń formalarǵa salynady. Sosyn qorytpany peshte kúıdiredi. Belgili temperatýrada arnaıy ýaqyt turǵan soń Soltústiktiń qyzyl-qońyr kirpishi daıyn bolady.
Zaýytta 80 adam jumys isteıdi, al ekinshi jeli qosylyp, tolyq qýatyna engende jumysshylar sany 200-ge jetýge tıis dep boljanǵan. Zaýyttyń jyldyq qýaty 40 mln dana kirpish shyǵarýǵa jetedi. Zaýyt ónimderi basqa oblystarǵa da tasymaldanyp jatyr. Suranys bolǵan soń zaýyt qojaıyndary kásiporyn qýatyn arttyrýdy kózdep otyr. О́ndiristi avtomattandyratyn jaraqtar alý josparlanǵan.
Soltústikqazaqstandyq «Mix Universal» kompanııasy bıyl qurǵaq qurylys qospalardy shyǵarýdy qolǵa aldy. Zaýyttyń jyldyq óndiris qýaty – osy ónimniń 13 myń tonnasyn shyǵarýǵa jetedi. Munda jetildirilgen sheteldik tehnologııalar qoldanylady. Sonyń nátıjesinde ónimniń sapasy da jaqsy. Bul qurylys jumystarynyń ónimdiligin arttyrady jáne sharshy metrdiń baǵasyn tómendetedi. Sondyqtan da oǵan suranys joǵary. Zaýyt qurylysyna ázirge 70 mln teńge quıylǵan. Kásiporynnyń dırektory Ádilet Álibekovtiń aıtýyna qaraǵanda, zaýyt jalpy sany 10 túrli ónim shyǵarady. Sonyń ishinde kafel jelimi, gıps sylaǵy jáne t.b. bar.
«Bizdiń ónimder alystan ákelinetin bazardaǵy ónimderdiń baǵasyna qaraǵanda 20-30 paıyzǵa deıin arzan. О́ıtkeni ónimdi ózimizdiń shıkizattan jasaımyz. Qum, mramor untaǵy – bári ózimizdiki. Osy arqyly ónimimiz arzan bolyp, básekelestikke tótep bere alady», deıdi ol.
Qazir zaýyt avtoklavty gazbloktar shyǵarýǵa da kirisken. Jumystyń bári tehnıkamen jasalady.
Soltústiktiń kásipkerleri halyq tutynatyn taýarlar shyǵarýǵa da kóńil bólip keledi. Sonyń ishinde «Radýga» JShS 2019 jyldan beri sabyn shyǵarady. Naryq suranysyna jaýap beretin kásiporyn iske qosylǵannan beri 4 myń tonna sabyn shyǵarǵan.
Sondaı-aq Irına Demıdova basqaratyn «RıM-KazAgro» JShS jýyrda ǵana jylyna 5 myń tonna qaǵaz ónimderin shyǵaratyn fabrıkany iske qosty. Oǵan quıylǵan ınvestısııa kólemi – 2,5 mlrd teńge. Jyldyń sońyna deıin fabrıka 80 adamdy jumyspen qamtymaq.
Soltústik Qazaqstan oblysy