Saılaý kúni Petropavldaǵy gýmanıtarlyq-tehnıkalyq kolledjde ornalasqan №575 saılaý ýchaskesine arnaıy keldik. Saılaý komıssııasynyń tóraǵasy Rýslan Ábishevtiń aıtýynsha, daýys berý kezinde eshqandaı aryz-shaǵym túspegen.
Saılaý ýchaskesinde 8 baıqaýshy tirkelgen bolsa, munda barlyǵy 1656 saılaýshy bar eken. Nemeresin ertken ájelerge deıin júr. «Saılaýshylar belsendiligi qalyptaǵydan joǵaryraq», deıdi R.Ábishev.
Balalar men jasóspirimder kitaphanasynda ornalasqan №577 saılaý ýchaskesindegi komıssııa tóraǵasy Maprýza Jumabaeva, EQYU-dan eki baıqaýshy kelgenin, olardyń eshqandaı eskertý jasamaǵanyn, saılaý prosesine oń pikir aıtqanyn jetkizdi. Munda daýys berýge kelgen adamdarǵa ystyq tamaq satatyn oryn da daıyndalǵan eken. Segiz kósheniń 1 633 saılaýshysyn qamtıtyn saılaý ýchaskesine kúndizgi saǵat 11.00 shamasynda 300-den artyq saılaýshy kelip, daýys berip úlgergen.
Qalanyń qaq ortasyndaǵy, S.Muqanov atyndaǵy oblystyq ámbebap kitaphanaǵa ornalasqan №586 saılaý ýchaskesinde 1281 saılaýshy tirkelgen. Saılaý komıssııasynyń tóraǵasy Galına Mıtrofanova halyqtyń kóbi tústen keıin kelgenin aıtady. Bul aımaqta kileń memlekettik organdar men kásiporyn-mekemelerdiń ofısteri ornalasqandyqtan turǵyn úı sany azdaý. Biz áńgimege tartqan Murat Álibekov degen azamat óziniń tańdaýyn jasaǵanyn, endi sony bekitýge daýys berýge kelgenin aıtty. «Aýylǵa asyǵys ketip bara jatyr edim, alaıda sharýa eshqaıda qashpas. О́zimniń sengen kandıdatymnyń ótkeni kerek», dedi jigit aǵasy.
Soltústik Qazaqstan oblysy