Men kóptegen asa iri halyqaralyq jarysta el namysyn abyroıly qorǵaǵan sportshymyn.
1996 jyly Atlantada alaýy tutanǵan jazǵy Olımpııa oıyndaryna Qazaqstan táýelsiz memleket retinde alǵash ret qatysqanda, atalǵan jarystyń ashylý saltanatynda kók baıraǵymyzdy kóterip shyǵý baqytyna ıe boldym. 2000 jyly Sıdneı Olımpıadasynda da dál sondaı qurmetke bólendim. Sol básekelerdiń ekeýinen de oljaly oraldym. AQSh-ta qola medaldi moınyma ilsem, Aýstralııada altyn tuǵyrǵa kóterildim. Sol kezderde keýdemdi maqtanysh sezimi kernep, ózimdi bul álemdegi eń baqytty adamdaı sezindim.
Búgin otbasymmen birge prezıdent saılaýyna qatysý úshin Almaty qalasyndaǵy №361 saılaý ýchaskesine kelip, óz tańdaýymyzdy jasadyq. Prezıdent – memlekettiń turaqtylyǵy, eldiń tynyshtyǵy men qaýipsizdiginiń kepili, ekonomıkalyq jáne áleýmettik turǵyda ósip-ónýine, órkendeýine eń jaýapty adam. Sol úshin de biz durys tańdaý jasaı bilýimiz kerek. Men Qazaqstannyń tutastyǵy, beıbitshilik pen jasampazdyq, halyqtyń ál-qýatynyń artýy jáne balalarymnyń bolashaǵy úshin daýys berdim. Jeke óz basym, Qazaqstannyń keleshegi jarqyn bolatynyna kámil senimdimin. Biz áli barlyq sala boıynsha álemniń aldyńǵy qatarynda kele jatqan alpaýyt elderdiń qataryna qosylamyz. Sol úshin de barlyǵymyz erinbeı eńbek etip, kózdegen maqsatymyzǵa jetý jolynda ójettik pen tabandylyq tanytýymyz kerek. Tek sonda ǵana Jańa Qazaqstan qura alamyz.
Ermahan YBYRAIYMOV,
bokstan Olımpıada chempıony