Buqara halyq jyldar boıy baspanaǵa qol jetkize almaı júrgende Jambyl oblysynda «arýaqtar» úı alýdan úmitin úzbeı kelgen. Iá, jaqynda biraz ýaqyt buryn baqılyq bolǵan 257 azamattyń turǵyn úı kezeginen áli kúnge shyǵarylmaǵany týraly aqparat tarady.
Jaǵa ustatatyn málimet taraǵaly birneshe apta ótse de, bul másele mańyzyn joımaǵan sekildi. Sybaılas jemqorlyqqa qarsy is-qımyl agenttigi Jambyl oblysy boıynsha departament basshysynyń birinshi orynbasarynyń mindetin atqarýshy Dáýren Omarovtyń aıtýynsha, óńirde «Turǵyn úı týraly» zańnamada kórsetilgen talap-mindetter boıynsha atqarylýǵa tıis jumystar óz deńgeıinde júrgizilmegen.
«Turǵyn úı qatynastary salasynda jergilikti atqarýshy organdardyń qurylymdyq bólimsheleri tarapynan «Turǵyn úı qatynastary týraly» zańnamada kózdelgen mindetterdiń oryndalmaı otyrǵany belgili bolyp otyr. Atap aıtqanda, kezekte turǵandardyń tizimin ózektendirý boıynsha is-sharalar tıisti deńgeıde júrgizilmegen. Sonymen qatar júrgizilgen monıtorıngke zer salsaq, 5725 adamnyń kezekte zańsyz turǵany áshkerelenip otyr», dedi departament ókili.
D.Omarovtyń málimdeýinshe, olardyń 257-si qaıtys bolǵan, 3415-iniń ártúrli jyljymaıtyn múlikteri bar bolyp shyqsa, 1955 azamat baspanaǵa muqtaj retinde esepke qoıylǵannan keıin nekege turǵan. Al 17 adamnyń basqa memleketterde turatyny anyqtalyp, 81 azamattyń múlde Jambyl oblysynda tirkelmegeni belgili bolǵan.
«Bul másele boıynsha Taraz qalasy men aýdan ákimderine monıtorıng nátıjeleri joldandy. Departamenttiń aralasýy nátıjesinde 1075 adam kezekten shyǵaryldy. Qalǵan 4650 azamat boıynsha qazirgi ýaqytta kezekten shyǵarý jóninde is-sharalar júrgizilýde», deıdi D.Omarov.
Jambyl oblysy