Búginde Memleket basshysynyń memlekettik tildi damytý jáne onyń rólin arttyrý, qazaq tilin belsendi túrde úırený, sondaı-aq, kúndelikti qyzmette qoldaný úshin qyzmetkerlerdiń qyzyǵýshylyǵyn arttyrý jónindegi saıasat júzege asyrylyp keledi. Buǵan elimizdiń prokýratýra organdary da qomaqty úles qosyp otyr.
Máselen, jýyrda prokýratýra organdary qyzmetkerleriniń arasynda «Memlekettik qyzmette – memlekettik tilmen» atty respýblıkalyq baıqaý ótti. Baıqaýǵa Bas prokýratýranyń Quqyqtyq statıstıka jáne arnaıy esepke alý jónindegi komıteti, Astana, Almaty qalalarynyń prokýratýralary, Bas áskerı prokýratýra, Bas kólik prokýratýrasy jáne oblystyq prokýratýralardyń ókilderinen quralǵan 19 komanda qatysty.
Bas Prokýrordyń orynbasary Jaqyp Asanov óziniń quttyqtaý sózinde atap ótkendeı, memlekettik tildiń qyzmet etýi memlekettik saıasattyń mańyzdy baǵyttarynyń biri bolyp tabylady. Sondyqtan baıqaýdy ótkizýdiń basty maqsaty memlekettiń til saıasatyn qoldaý, prokýratýra organdaryndaǵy qazaq tiliniń qoldanylý aıasyn keńeıtý jáne nasıhattaý bolyp tabylady.
Árbir komanda memlekettik tildi bilý men ony óziniń kúndelikti kásibı qyzmetinde qoldaný deńgeıin kórsetti. Baıqaýǵa qatysýshylar ártúrli qyzmettik jaǵdaılardaǵy aýyzsha sóıleý sheberlikterimen jarysyp, qyzmettik qujattardy ázirleý, olardy sapaly aýdarý daǵdylaryn kórsetti. Sondaı-aq, ádilqazylar sot prosesindegi memlekettik aıyptaýshynyń rólindegi prokýror sheshendiginiń sapasy men mádenıetin baǵalady.
Quramyna Prezıdent Ákimshiliginiń, Joǵarǵy Sottyń, Mádenıet, Ádilet mınıstrlikteriniń ókilderi, Parlament depýtattary, Bas prokýratýranyń qyzmetkerleri, prokýratýra organdarynyń ardagerleri engen qazylar alqasy baıqaýdyń nátıjelerin baǵalady.
Baıqaý qorytyndysy boıynsha jeńimpazdar baǵaly syılyqtarmen marapattaldy.
Aleksandr TASBOLATOV,
«Egemen Qazaqstan».