«AMANAT»-tyń Partııalyq baqylaý komıtetiniń jıynynda osy jyly atqarylǵan jumys qorytyndylandy, dep habarlaıdy Egemen.kz.
Partııalyq baqylaý komıtetiniń (PBK) tóraǵasy, Parlament Májilisindegi «AMANAT» fraksııasynyń múshesi Artýr Platonov halyqtyń belsendi atsalysýynyń arqasynda óńirlik 216 saılaýaldy baǵdarlama talqylanyp, qabyldanǵanyn atap ótti. Onda azamattardyń 17 myńnan astam usynysy eskerildi.
«О́zgerister joly: Ár azamatqa laıyqty ómir!» dep atalatyn partııalyq baǵdarlamanyń basymdyǵy – qazaqstandyqtardyń ómir súrý sapasyn arttyrý, áleýmettik ádilettilikti qamtamasyz etý, esep beretin jáne halyq únine qulaq asatyn memleket qurý. Baǵdarlamany iske asyrýǵa barlyǵy 21 trln teńge tartý josparlanǵan. Onyń qarjylyq jáne adamı resýrstarmen qamtamasyz etilgen bıik maqsaty, baıypty baǵdary bar», dedi Artýr Platonov.
Búginde saılaýaldy baǵdarlamany iske asyrý sheńberinde el aýmaǵynda 90 mektep paıdalanýǵa berildi. Sonymen qatar 259 balabaqsha ashylyp, 180 kolledjde jańǵyrtý jumysy júrgizildi. Buǵan qosa, 11,7 mln sharshy metr turǵyn úı (100 myńǵa jýyq baspana) salynyp, 500 myńǵa jýyq jumys orny quryldy.
Bul rette, jýyrda Memleket basshysy Qasym-Jomart Toqaev Úkimettiń keńeıtilgen otyrysynda bıylǵy 11 aıda ekonomıka ósimi 4,6%-dan 2,7%-ǵa deıin baıaýlaǵanyn, al ınflıasııa sońǵy 14 jylda bolmaǵan deńgeıge jetip, 19,6%-dy quraǵanyn málimdedi. El ekonomıkasyndaǵy osyndaı jaǵymsyz jaǵdaı partııanyń saılaýaldy baǵdarlamasyn iske asyrý sapasyna tikeleı áser etedi.
Ulttyq ekonomıka mınıstri Álibek Qýantyrovtyń aıtýynsha, bıyl turǵyzylady dep josparlanǵan 18 mln sharshy metr turǵyn úıdiń jyl sońyna deıin 15,1 mln sharshy metri nemese 137,7 myń baspana salynady.
«Shamamen 3 mln sharshy metrdi salyp úlgere almaı jatyrmyz. Buǵan jumys kestesinen artta qalý, qarjylandyrýdyń jetkiliksizdigi sebep bolyp otyr. Alaıda eń basty kedergi – qurylys materıaldarynyń qymbattaýy. Belgili bir deńgeıde ımportqa táýeldilik bolǵandyqtan, elge qurylys materıaldaryn jetkizý kezinde qıyndyqtar oryn aldy», dedi mınıstr.
2022 jyly atqarylǵan jumysty qorytyndylaı kele, Artýr Platonov bıyl Komıtet ortalyq jáne jergilikti atqarýshy organdarǵa 200-den astam naqty usynys bergenin atap ótti. Jergilikti jerlerde partııalyq baqylaý komıssııalarymen birlesip eńbek ujymdarymen, turǵyndarmen, qoǵam qaıratkerlerimen jáne taǵy basqalarmen 600-den astam dóńgelek ústel, 1100-den astam kezdesý, sondaı-aq 5 myńnan astam kóshpeli otyrys pen reıd ótkizildi.
«Azyq-túlik taýarlary, dárilik zattar jáne janar-jaǵarmaı baǵasynyń ózgerýine baqylaý júrgizý boıynsha 216 monıtorıng tobynyń jumysyn erekshe atap ótkim keledi. Bul jumys turǵyndardyń oń baǵasyn aldy. Sondaı-aq partııalyq baqylaý beketin qurý jumysy qolǵa alyndy. О́ńirlerde «AMANAT» partııasynyń Saılaýaldy baǵdarlamasyn iske asyrý sheńberinde salynyp, jóndelip nemese qaıta jańartylyp jatqan nysandarda tamyz aıynan bastap osyndaı 485 bekettiń jumysy uıymdastyryldy», dedi ol.
Bıyl partııa múshesiniń Ádep kodeksin buzǵany úshin partııanyń 104 múshesi, onyń ishinde qala jáne aýdan ákimderi, olardyń orynbasarlary, ortalyq jáne jergilikti memlekettik organdardyń departament jáne basqarma basshylary, túrli deńgeıdegi máslıhattardyń 22 depýtaty jaýapkershilikke tartyldy.