Qazaqstan-О́zbekstan: Yntymaqtastyqtyń baıandy qaǵıdaty

Ortaq maqsat-murat

Memlekettik sapar aıasynda Qasym-Jomart Toqaev resmı kezdesý ótkizý úshin halyqaralyq kongress ortalyǵyna keldi. Memleket basshy­syn О́zbekstan Prezıdenti Shavkat Mırzııoev qarsy aldy. Prezı­dent Qasym-Jomart Toqaevty resmı qarsy alý rásimi halyq­ara­lyq kongress ortalyǵynda ótti.

Qurmet qaraýylynyń bastyǵy eki el basshylaryna raport berip, Qazaqstan men О́zbekstannyń ánurandary oryndaldy. Qasym-Jomart Toqaev pen Shavkat Mırzııoev bir-birine resmı delega­sııa­lardyń quramyn tanystyrdy.

Budan soń memleketter basshylary shaǵyn quramda kelissóz júrgizdi. Qazaqstan Prezıdenti qonaqjaılyq kórsetip qarsy alǵan Shavkat Mırzııoevke rızashylyǵyn bildirip, memlekettik sapardyń mańyzdylyǵyn atap ótti.

 – Biz О́zbekstanmen yntymaqtas­tyqty odan ári nyǵaıtýǵa múddelimiz. Qazaq pen ózbek – ejelden dostyǵy myzǵymas, syılastyǵy jarasqan ba­ýyrlas halyqtar. Eki eldiń salt-dástúri, mádenıeti, tili, dini uqsas. Tarıhy tamyrlas, taǵdyrlas elderimizdiń maqsat-muraty da ortaq. Sondyqtan men búgingi saparǵa aıryqsha mán beremin. Biz tatý kórshilikke jáne senimdi seriktestikke negizdelgen qarym-qatynasty jańa deń­geıge kóteremiz dep senemin. Qazaq­stan men О́zbekstan arasyndaǵy ynty­maq­tastyq neǵurlym tyǵyz jáne tabys­ty bolsa, Ortalyq Azııadaǵy ahýal soǵur­lym turaqty bolady, – dedi Qasym-Jomart Toqaev.

Sonymen qatar Memleket basshysy О́zbekstan Prezıdentiniń Joldaýymen tanysqanyn jáne bul mańyzdy qujat О́zbekstannyń odan ári tabysty damýy­na jol ashatynyn jetkizdi.

Shavkat Mırzııoev óz kezeginde Qazaq­stan Prezıdentin saılaýdaǵy jeńisimen quttyqtap, О́zbekstanǵa memlekettik saparmen kelý týraly shaqyrýyn qabyl alǵany úshin rızashylyǵyn bildirdi. О́zbekstan Prezıdentiniń aıtýynsha, Qasym-Jomart Toqaevtyń bul sapary eki el qarym-qatynastarynyń damýy­na tyń serpin berip, qol qoıylatyn qujattar naqty is-áreketterge berik negiz bolady.

Prezıdentter saıası, saýda-ekonomı­kalyq jáne mádenı-gýmanıtarlyq salalardy keńeıtýge kóńil bólip, qazaq-ózbek strategııalyq seriktestiginiń aýqymdy máselelerin talqylady. Atap aıtqanda, eki el – Ortalyq Azııadaǵy eń iri saýda seriktester. Bıyl saýda aınaly­my 35 paıyzǵa ósip, 5 mıllıard dollar­ǵa jýyqtady. Mundaı kórsetkishke ónerkásip, mashına jasaý, logıstıka, kólik, energetıka jáne basqa da salalarda birlesken jobalardy júzege asyrý arqyly qol jetkizilgenine nazar aýdaryldy. Sondaı-aq taraptar jahandyq jáne aımaqtyq kún tártibindegi ózekti máselelerdi talqylady.

Shaǵyn quramdaǵy kezdesýden keıin Qasym-Jomart Toqaev pen Shav­kat Mırzııoev eki memlekettiń resmı dele­gasııalarynyń qatysýymen keńeıtilgen quramda kelissóz júrgizdi.

Prezıdentter saýda-ekonomıkalyq yntymaqtastyqty nyǵaıtýǵa, sonyń ishinde ózara taýar aınalymyn ulǵaıtýǵa, ınvestısııa tartýǵa, ónerkásip, farmasevtıka, aýyl sharýashylyǵy, qury­lys, tranzıt áleýeti jáne kólik logıstıkasy salalaryndaǵy kooperasııany damytýǵa basa mán berdi. Sondaı-aq bilim berý jáne mádenı-gýmanıtarlyq salalarda ózara is-áreket máselesi de talqylandy.

Memleket basshysy shaǵyn quramda ótken kelissóz nátıjesine joǵary baǵa berip, ekijaqty yntymaqtastyqty dos­tyq, tatý kórshilik qarym-qatynas jáne ózara qoldaý rýhynda keshendi túrde keńeıtýge nıetti ekenin jetkizdi.

Qasym-Jomart Toqaev elderimiz búginde memleketaralyq seriktestikke úlgi bolatyndaı berik ári úılesimdi qarym-qatynas ornatqanyn atap ótti.

– Odaqtastyq qarym-qatynas týraly shartqa qol qoıý bizdiń memleketaralyq baılanystarymyzdyń joǵary deńgeıde ekenin kórsetedi. Eger biz shartty tarıhı mańyzy bar qujat dep ataıtyn bol­saq, bul asyra aıtqandyq emes dep oılaı­myn. Bul asa mańyzdy qujat biz úshin jańa múmkindikterge jol ashady jáne eki eldiń ózara yntymaqtastyqty ny­ǵaı­týǵa degen ortaq umtylysyn bil­diredi. Budan bólek, búgin Qazaqstan men О́zbekstannyń memlekettik shekaralaryn demarkasııalaý týraly shartqa qol qoıylady. Bul tarıhı kelisim Qazaq­stannyń ońtústigindegi mem­leket­tik shekarasyn halyqaralyq-quqyq­tyq turǵyda rásimdeý isin tolyǵy­men aıaqtaıdy, – dedi Prezıdent.

Memleket basshysy odaqtastyq qarym-qatynasty nyǵaıtý jolyndaǵy birlesken is-áreketter búkil Ortalyq Azııa­nyń ornyqty damýy men turaqty­lyǵyn qamtamasyz etýge eleýli úles qosatynyn atap ótti.

Sonymen qatar kelissóz barysynda prezıdentter ekijaqty yntymaq­tastyqtyń saıası tuǵyrnamasyn bekemdeı túsetin Joǵary memleketaralyq keńes pen Parlamentaralyq keńes qurý jóninde ýaǵdalasty.

Qasym-Jomart Toqaev taraptar túrli halyqaralyq qurylymdar men meha­nızmder aıasynda tabysty jumys júrgizip kele jatqanyn aıtty. О́ńirlik jáne halyqaralyq kún tártibindegi kóptegen másele boıynsha Qazaqstan men О́zbekstannyń ustanymdary ortaq, kózqarastary uqsas.

О́z kezeginde Shavkat Mırzııoev sha­ǵyn quramdaǵy kelissózdiń nátıjeli bolǵa­nyn atap ótip, taýar aınalymynyń ulǵaıǵanyna jáne birlesken jobalar­dyń sátti júzege asyrylyp jatqanyna toqtaldy.

 – Sizdiń memlekettik saparyńyz biz­diń ǵasyrlar boıy qalyptasqan dos­tyq, tatý kórshilik jáne ózara qoldaý sıpatyndaǵy baılanystarymyzdyń qanshalyq berik ekenin taǵy naqtylaı túsedi. Bizdiń halyqtarymyzdyń tarıhy men taǵdyry bir-birimen bite qaınasqan. Elderimizdiń tarıhı tamyry ortaq ári biz ózekti máselelerdi birlese sheshemiz,   –  dedi О́zbekstan Prezıdenti.

Sondaı-aq taraptar mádenı-gýma­nıtarlyq baılanystardyń damýyna oń baǵa berdi. Eki el halqynyń ortaq rýhanı-mádenı qundylyqtaryn baıyta túsken Qazaqstan men О́zbekstannyń máde­nıet kúnderi tabysty ótti. Son­daı-aq elderimizdiń bilim berý salasyn­daǵy yntymaqtastyq máselesi de qaras­tyryldy.

Budan keıin Qasym-Jomart Toqaev pen Shavkat Mırzııoev birlesken nysandardyń qurylysyn saltanatty túrde bastaý rásimine qatysty. Memleketter basshylaryna Qazaqstan men О́zbekstan arasyndaǵy birlesken jobalardyń júzege asyrylýy jóninde egjeı-tegjeıli málimet berildi. Atap aıtqanda, Qaraǵandy oblysynda turmystyq tehnıka, Shymkentte ınfý­zııalyq eritindi, Qostanaıda Chevrolet avtomobılderin shyǵaratyn joba iske qosylady.

О́z kezeginde О́zbekstannyń Naýaı oblysynda mıneraldy tyńaıtqyshtar óndirisine, Tashkent oblysynda lo­gıs­tıkalyq ortalyq pen Tashkent qala­synda turǵyn úı-kommersııalyq ınfra­qurylymynyń qurylysyna qatysty jobalar josparlanǵan.

Qasym-Jomart Toqaev pen Shavkat Mırzııoev birlesken jobalardyń tabys­ty júzege asýyna tilektestik bildirip, nysandardyń qurylysyn saltanatty túrde bastap berdi.

Qazaqstan ınvestısııasymen О́zbek­stan­nyń Naýaı oblysynda mıneraldy ty­ńaıt­­qyshtar kásiporny ashylady. Prezı­dent Qasym-Jomart Toqaevtyń О́zbek­stanǵa memlekettik sapary aıasynda eki el­diń birlesken birqatar jobasy iske qosyl­dy. Sonyń biri – О́zbekstannyń Naýaı ob­ly­synda fosfor jáne keshendi mıne­ral­dy tyńaıtqyshtar óndiretin kásiporyn.

«Qazfosfat» JShS jáne «Ýzkı­mıosanoat» AQ qatysýymen júzege asyrylatyn óndiristiń jobalyq quny – 1,3 mıllıard dollar.  Jobanyń 2022-2024 jyldarǵa josparlanǵan birinshi kezeńinde «Navoııazot» bazasynda kalıı selıtrasy (100 myń tonna) men kalıı sýlfaty (100 myń tonna) óndirisin jolǵa qoıý josparlanyp otyr. Joba aıasynda 150 jumys orny ashylady. Al óndiristiń ekinshi jáne úshinshi kezeńderi Almalyq jáne Ferǵana qalalarynda jalǵasady.

Memleket basshysy Qasym-Jomart Toqaev О́zbekstan Respýb­lıkasyna memlekettik sapary barysynda osy eldiń Prezıdenti Shavkat Mırzııoevpen birge Tóle bı kesenesine zııarat etti.

Prezıdent Tashkent qalasyndaǵy kór­nek­ti oryndardyń biri Tóle bı kesene­sine arnaıy bardy. Tashkent qalasynyń aýmaǵynda ornalasqan tarıhı mazar XV ǵasyrdyń birinshi jartysynda salynǵan.

Sondaı-aq Memleket basshysy Tashkent qalasynda ótip jat­qan «Abaı. Baýyrlas halyqtar mura­sy» atty uly aqynnyń ómiri men shyǵar­ma­shylyǵyna arnalǵan kórmege bardy. Bul kórme – eki el arasyndaǵy dos­tyq pen baýyrlastyq baılanys­tar­dy odan ári nyǵaıtýǵa baǵyttalǵan ma­ńyzdy qadam.

«Abaı. Baýyrlas halyqtardyń mu­rasy» atty kórmede uly aqyn­nyń shy­ǵar­­­­mashy­lyǵyndaǵy Álisher Naýaı­­dyń róli, Abaı ómiriniń negizgi kezeń­­deri, Á.Qasteev, O.Tańsyqbaev, E.Sıdor­kın, N.О́tepbaev jáne taǵy basqa sýretshi­lerdiń týyndylaryndaǵy Abaı týraly sıýjet­ter qamtylǵan. Oǵan qosa, Abaı­dyń «Jı­de­baı-Bórili» memlekettik tarı­hı-má­denı jáne ádebı-memorıaldyq qo­ryq-mý­zeıiniń 120-dan astam eksponaty qoıylǵan.

 

Ekonomıkalyq baılanys áleýeti

Qasym-Jomart Toqaev pen Shavkat Mırzııoev shaǵyn jáne keńeıtilgen quramdaǵy kelissózderden keıin buqara­lyq aqparat quraldary ókilderi úshin birlesken málimdeme jasady.

Qazaqstan Prezıdenti, eń aldymen, Shavkat Mırzııoevke memlekettik saparmen kelýge shaqyrǵany úshin rızashylyǵyn bildirdi. Onyń aıtýyn­sha, О́zbekstan uzaq jyldar boıy Qazaqstannyń osy aımaqtaǵy basty strategııalyq seriktesi boldy, al búginde senimdi odaqtasqa aınaldy.

– Belsendi saıası dıalogtiń jáne eki el úkimetteriniń úılesimdi jumysynyń nátıjesinde qazaq-ózbek qatynastary barlyq baǵytta buryn-sońdy bolmaǵan  qarqynmen damyp keledi. Biz jańa ǵana Shavkat Mıromonovıch Mırzııoevpen birge tarıhı kelisimderge qol qoıdyq. Bul qujattardyń memleketterimiz arasyndaǵy yntymaqtastyq pen ózara baýyrlastyq qarym-qatynastar jylnamasyna altyn árippen jazylatynyna kámil senemin. Qazaqstan men О́zbekstan arasyndaǵy Odaqtastyq qatynastar týraly shart halyqtarymyzdyń baılanysyn odan ári nyǵaıtýǵa degen ózara umtylysyn bildiredi jáne elderimizdiń túbegeıli múddelerine saı keledi, – dedi Qasym-Jomart Toqaev.

Sonymen qatar Prezıdent memleket­terimizdiń ortaq shekarasyn quqyqtyq turǵyda qamtamasyz etken, bolashaq urpaq arasyndaǵy yntymaqtastyqtyń myzǵymas negizin qalaǵan Memlekettik shekarany demarkasııalaý týraly shartqa qol qoıylýyn joǵary baǵalady. Onyń aıtýynsha, bul qadam ǵasyrlar boıǵy dostyǵymyz ben tatýkórshilik qatynastarymyzdy saqtaý jónindegi babalar ósıetiniń oryndalǵanyn kórsetedi.

Kelissózder barysynda memleket­ter basshylary Qazaqstan men О́zbekstannyń ekijaqty saýda salasyndaǵy ynty­maq­tastyqty odan ári nyǵaıtý úshin orasan zor áleýet bar degen ortaq baılamǵa keldi. Qasym-Jomart Toqaev birlesken is-sharalardyń nátıjesinde byltyr taýar aınalymy shamamen 4 mıllıard dollarǵa jetkenin, bul qarqyn bıyl da saqtalyp otyrǵanyn atap ótti. Osy jyldyń qorytyndysy boıynsha taýar aınalymy shamamen 5 mıllıard dollarǵa jetedi.

– Saýda-sattyqty odan ári damytý maqsatynda taýarlar nomenklatýrasyn keńeıtý jáne elderimizdiń saýda-ekonomıkalyq yqpaldastyǵyn tejeıtin kedergilerdi josparly túrde joıý úshin tıisti sharalar qabyldaýǵa kelistik, – dedi Memleket basshysy.

Sondaı-aq ónerkásip kooperasııasy salasyndaǵy ózara is-áreketti keńeıtý basym mindet retinde atap ótildi. Mashı­na jasaý, farmasevtıka, qurylys jáne jeńil ónerkásip salalarynda 10 birlesken kásiporyn ashylyp, tabysty jumys istep jatqany týraly aıtyldy.

– Búgin О́zbekstan Prezıdentimen birge ónerkásiptik yntymaqtastyqty odan ári nyǵaıtýǵa yqpal etetin birqatar birles­ken iri jobany iske qostyq. Sony­men qatar keshe  aımaqaralyq bıznes-forým aıasynda quny 2,5 mıllıard dollardan asatyn ózara tıimdi kommersııalyq kelisimsharttarǵa qol qoıyldy. Jal­py, sapar qorytyndysy boıynsha quny 8 mıllıard dollardan asatyn ınves­tısııalyq kelisimder men ekijaqty qujat­tarǵa qol qoıyldy. Memleket­teri­miz arasyndaǵy seriktestikti ke­ńeıtýge Halyqaralyq ónerkásiptik kooperasııa ortalyǵy tyń serpin berýge tıis. Ol Ortalyq Azııadaǵy eń iri saýda-ónerkásip habyna aınalyp, elderimizdiń kólik-logıstıka­lyq múmkindikterin keńeıtedi, – dedi Prezıdent.

Qasym-Jomart Toqaev agroóner­kásip salasyndaǵy ózara saýda kólemin ulǵaıtý perspektıvalaryna nazar aýdar­dy. Bıyl 9 aıdyń qorytyndysy boıynsha elderimiz arasyndaǵy aýyl sharýashylyǵy salasyndaǵy taýar aınalymy 30 paıyzǵa artyp, 1 mıllıard dollardan asty.

– Biz et ónimderin óndiretin, óńdeıtin, kókónister men jemis-jıdekterdi qaptaıtyn, maıly daqyldar, bıdaı, kartop ósiretin birlesken kásiporyndar ashý múmkindigin qarastyrý úshin úkimet­terimizge tapsyrma berýge kelistik. Sondaı-aq agroónerkásip kesheni salasy boıynsha kadrlar daıarlaýǵa jáne ony ǵylymı turǵyda qamtamasyz etýge baǵyt­talǵan yntymaqtastyqty nyǵaı­tý qa­jettigi atap ótildi. Jahandyq naryq­taǵy turaqsyzdyq jaǵdaıynda búgingi qabyldanǵan sheshimder elderimizdiń azyq-túlik qaýipsizdigin qamtamasyz etýge zor úles qosady dep sanaımyn, – dedi Memleket basshysy.

Taraptar aımaqtaǵy saýda-kólik dáliz­derin damytý máselesin de talqy­lady. Bul baǵytta Qazaqstan men О́zbek­stan mańyzdy ról atqarady. Eki el basshylary Darbaza – Maqtaaral temir jol qurylysyn tezirek aıaqtaý úshin kúsh salýǵa ýaǵdalasty. Bul Syrdarııa stansasyna shyǵýǵa múmkindik beredi.

Qasym-Jomart Toqaev atalǵan baǵyt «Saryaǵash» ótkizý pýnktiniń tranzıttik áleýetin keńeıtýge jáne júktemesin azaıtýǵa múmkindik beretinin atap ótti.

– Qazaqstan kompanııalary túrli kólik qatynastary qurylysyna belsendi atsalysýǵa jáne qajetti materıaldardy jetkizýge daıyn. Biz Transkaspıı halyqaralyq kólik baǵytyn birlese damytýǵa ýaǵdalastyq, – dedi Prezıdent.

Sonymen qatar kelissóz barysynda energetıka salasyndaǵy yntymaqtastyq pers­pek­tıvalary, atap aıtqanda, jetkizý, tranzıt jáne kómirsýtegin óńdeý má­seleleri qarastyryldy. Eki el úkimet­teri­ne energetıka salasyndaǵy ekijaqty qaty­nastardyń ózekti baǵyttary boıyn­sha naqty usynys berý tapsyryldy.

Memleketter basshylary Ortalyq Azııadaǵy transshekaralyq ózenderdiń resýrsyn tıimdi paıdalaný máselelerine qatysty úılesimdi jumystardy jalǵas­tyrýǵa kelisti. Bul baǵyttaǵy túıt­kil­derdi tezirek sheshý úshin birles­ken shara­lar qabyldaý qajettigine nazar aýdaryldy.

Dástúr boıynsha mádenı-gýmanı­tarlyq baılanystarǵa basa mán berildi. Memleket basshysy halyqtarymyzdyń ǵasyrlar boıǵy dostyǵy shynaıy tatýkórshilik qatynastar men ózara qur­mettiń jarqyn úlgisi bolatynyn aıtty.

– Ortaq mádenı-rýhanı qundylyq­tary­myzdy odan ári baıyta túsý úshin ótken aptada Astanada О́zbekstannyń Mádenıet kúnderi tabysty ótti.  Al búgin Tashkent turǵyndary men qonaq­taryna qazaqtyń uly aqyny jáne aǵartýshysy Abaıǵa arnalǵan kórmeni tamashalaýǵa múmkindik týdy. Bizdiń ortaq tarıhymyzǵa qurmet kórset­keni, Qazaqstannyń mádenı murasyn dáriptegeni úshin Shavkat Mıromonovıch Mırzııoevke jáne baýyrlas barsha ózbek halqyna rızashylyǵymdy bildiremin, – dedi Qasym-Jomart Toqaev.

Delegasııa ókilderiniń kezdesýi barysynda jastar arasynda ózara baı­lanys­tardy damytý bastamalaryna, sonyń ishinde ýnıversıtetaralyq yntymaqtastyq aıasynda qoldaý kórsetý isine kóńil bólindi. Taraptar Qazaqstan men О́zbekstannyń jetekshi oqý oryndarynda teńgerimdi negizde fılıaldar ashý josparyn quptady.

Prezıdent sapar aıasynda óńirlik jáne jahandyq kún tártibindegi máse­leler de talqylanǵanyn atap ótti. Ási­rese Ortalyq Azııadaǵy turaqtylyq pen qaýipsizdikti qamtamasyz etý másele­sine erekshe nazar aýdaryldy.

Kelissóz qorytyndysy boıynsha Qasym-Jomart Toqaev pen Shavkat Mırzııoev Qazaqstan Respýblıkasy men О́zbekstan Respýblıkasy arasyndaǵy Odaqtastyq qatynastar týraly shartqa jáne Qazaqstan Respýblıkasy men О́zbekstan Respýblıkasy arasyndaǵy Qazaqstan-О́zbekstannyń memlekettik shekaralaryn demarkasııalaý týraly shartqa qol qoıdy.

Sonymen qatar resmı delegasııa­lardyń músheleri memleket basshy­lary­nyń qatysýymen birqatar qujatqa qol qoıdy. Olardyń qatarynda Qazaq­stan Respýblıkasynyń Úkimeti men О́zbekstan Respýblıkasynyń Úki­meti arasyndaǵy «Ortalyq Azııa» ha­lyq­aralyq ónerkásiptik kooperasııa ortalyǵyn qurý týraly negizdemelik kelisim, Qazaqstan Respýblıkasy Saýda jáne ıntegrasııa mınıstrligi men О́zbek­stan Respýblıkasy Investısııalar jáne syrtqy saýda mınıstrligi arasyn­daǵy Elektrondyq saýda júıesin damytý salasyndaǵy ózara túsinistik týraly memorandým bar.

Budan bólek, Qazaqstan Respýblı­kasynyń Úkimeti men О́zbekstan Respýb­lıkasynyń Úkimeti arasyndaǵy Joǵary jáne joǵary oqý ornynan keıingi bilim salasyndaǵy yntymaqtastyq týraly kelisim, Qazaqstan Respýblıkasynyń Úkimeti men О́zbekstan Respýblıkasynyń Úkimeti arasyndaǵy Ekologııa jáne qorshaǵan ortany qorǵaý salasyndaǵy yntymaqtastyq týraly kelisim, Qazaq­stan Respýblıkasy Ekologııa, geologııa jáne tabıǵı resýrstar mınıstrligi men О́zbekstan Respýblıkasynyń Orman sharýashylyǵy jónindegi memle­kettik komıteti arasyndaǵy Orman sharýashylyǵy salasyndaǵy ózara túsinistik týraly memorandýmǵa qol qoıyldy.

2000 jylǵy 7 shildedegi Qazaqstan Respýblıkasynyń Úkimeti men О́zbek­stan Respýblıkasynyń Úkimeti ara­syn­daǵy Azamattardyń ózara sapar­lary­nyń sharttary týraly keli­simge ózgerister engizý týraly hatta­ma qabyldanyp, Qazaqstan Respýb­lı­kasynyń Strategııalyq josparlaý jáne reformalar agenttigi men О́zbekstan Respýblıkasynyń Prezıdenti janyndaǵy Strategııalyq reformalar agenttigi arasyndaǵy Yntymaqtastyq týraly memorandým jasaldy.

Qazaqstan Respýblıkasynyń Mem­leket­tik qyzmet isteri agenttigi men О́zbek­stan Respýblıkasy Prezıdenti­niń janyndaǵy Memlekettik qyzmetti damytý agenttigi arasyndaǵy Memle­kettik qyzmet salasyndaǵy ózara túsi­nistik týraly memorandýmǵa, Qazaq­stan Respýblıkasy Qyzylorda obly­­synyń ákimdigi men О́zbekstan Respýb­lıkasy Naýaı oblysynyń hokımıaty arasyndaǵy yntymaqtastyqty keńeı­týdiń 2023-2024 jyldarǵa arnalǵan jol kartasyna qol qoıyldy.

Sondaı-aq qujattar arasynda Qazaq­stan Respýblıkasy Túrkistan obly­synyń ákimdigi men О́zbekstan Respýb­lıkasy Jızaq oblysynyń hokımıaty arasyndaǵy yntymaqtastyqty keńeı­tý­diń 2023-2024 jyldarǵa arnalǵan jol kartasy, Qazaqstan Respýblıkasy Túrkistan oblysynyń ákimdigi men О́zbekstan Respýblıkasy Tashkent obly­synyń hokımıaty arasyndaǵy ynty­maqtastyqty keńeıtýdiń 2023-2024 jyldarǵa arnalǵan jol kartasy bar.

«QazMunaıGaz» Ulttyq kompanııasy» AQ men «Ýzbekneftgaz» AQ ara­syndaǵy kelisimge, «Eurasian Resources Group S.a.r.L.» kompanııa­sy men «Sanoat Energetika Guruhi Enera» JShQ arasyndaǵy Yntymaqtastyq týraly kelisimge, «Qazfosfat» JShS, «Ýzkı­mıosanoat» AQ jáne KP Fertili­zers Ltd. arasyndaǵy О́zbekstan Respýb­lıkasynda mıneraldy tyńaıtqyshtar óndirý jónindegi birqatar keshender qurylysynyń ınvestısııalyq jobalaryn iske asyrý sheńberindegi birlesken áriptestik týraly kelisimge jáne «PTC Holding» JShS (Qazaqstan Respýblıkasy) men О́zbekstan Respýb­lıkasy Tashkent oblysynyń hokımıa­ty arasyndaǵy Yntymaqtastyq jáne ózara túsinistik týraly memorandýmǵa qol qoıyldy.