ELBASY ESKERTKIShI ANKARADA ASQAQTAIDY

Túrik Respýblıkasynyń Prezıdenti Abdýlla Gúl: ZOR RIZAShYLYǴYMYZDYŃ BELGISI Túrkııa Prezıdenti Abdýlla Gúl “KADEH-2010” qarý-jaraq jáne áskerı-tehnıkalyq múlikterdiń halyqaralyq kórmesine qatysqannan keıin “Nur-Orda” halyqaralyq qazaq-túrik lıseıinde boldy. – Qazaqstan Prezıdenti Nur­sul­tan Nazarbaevqa kúlli túrki ále­mi úshin jasap kele jatqan eńbegine zor rızashylyǵymdy bildiremin, biz qurmetti Nursultan Nazarbaevqa An­karada eskertkish ornatý nıe­tin­demiz, – dedi A.Gúl oqý ornynyń ujymy aldynda sóılegen sózinde. TÚRKI ÁLEMINIŃ KО́ShBASShYSY Namyq Kemal ZEIBEK, memleket jáne qoǵam qaıratkeri. Kúlli túrki dúnıesi Túrkistan dese eleńdep-aq turady. Oǵan Túrik Respýblıkasy Mádenıet mınıstri, Memleket mınıstri bolyp qyzmet atqarǵan jyldary atalǵan ýnıver­sı­tetke túrli túrki ult-ulystary balalaryn jınaqtaý saparynda da Baıkaldan Balqanǵa deıin issapar­da júrip ótkende buǵan anyq kózim jetken. Mine, kórmeısizder me, jýyr­­da Q.A.Iаsaýı babamyzdyń atyn­daǵy oqý ornynda baýyrlas eki eldiń prezıdentteri – N.Á.Na­zar­baev pen Abdýlla Gúl bas ǵı­ma­rattyń jáne aýrýhananyń tusaýyn kesti. Endi qurylysy bastalyp jatqan oqý ǵımaraty, kitaphana, jat­aqhananyń irgetasyn qalady. Túrkııadan birge kelgen árip­tes­terim­niń shyn júrekten qýanǵanyn kórip myna men – túrkistandyq Na­myq Kemal Zeıbek júregim ja­ryla qýanaıyn bir! О́zim birsypyra jyl basqarǵan oqý orny úshin – bir, Túrkistan úshin eki qýandym. Ýnıversıtettiń Qurmetti pro­fes­sory qataryna qabyldanǵan sá­tinde Mádenıet saraıynda Abdýlla Gúl tebirenisti sóz sóıleı kele, “Nursultan Nazarbaev – túrki tekti memleketterdiń kóshbasshysy! Men bul baǵalaý pikirimdi N.Á.Na­zarbaev Túrkııada resmı saparda bolǵan kezinde de aıtqanmyn, búgin de qaıtalap aıtamyn!” – dedi de bı­lik sımvoly asataıaq syılady. Bul – Qazaqstan Respýblıkasy Pre­zıdentine berilgen tarıhı baǵa bolatyn. Rasynda, Túrkııada qazirgi álemdik saıasattan habary bar izgi kóńildi adamnyń bári de Nursultan aǵamyzǵa erekshe yqylasty. 2007 jyly N.Á.Nazarbaev Túrkııada sa­pard­a bolǵan kezinde “Radıkal” (2.10.2007 j.) gazeti betinde “Bizdiń de Jumhýrbashkanymyz” degen maqala jazdym. Demek, N.Á.Na­zar­baev – bizdiń de Elbasymyz degen sóz. Sol yqylastylyqty bizdiń Prezıdentimiz Abdýlla Gúl “Túrki memleketteriniń kóshbasshysy” dep údetip alyp ketip otyr. Túrkııa Prezıdenti N.Á.Nazarbaevtyń halyqaralyq arenadaǵy, onyń ishinde kúlli túrki dúnıesindegi tarıhı qyzmetin óte dál baǵalap aıtyp otyr dep bilemin. Elbasy N.Á.Nazarbaevtyń qamqorlyǵy men iskerlik qaırat­ker­ligi arqasynda Astanada Musta­fa Kemal Atatúrikke tamasha es­kert­kish ornatyldy. Men túrik aza­maty raıynda qýandym. Sol sát­ter­den bastap N.Á.Nazarbaevqa Túrkııada bir eskertkish qoıylsa degen oıda boldym. О́ıtkeni, ol Atatúrik amanatyn alǵy kúnge alyp barýshy, túrki dúnıesinde sony júzege asyrýshy kóshbasshy bolyp otyr ǵoı. Astanada Túrkııa Pre­zı­denti Abdýlla Gúl N.Á.Nazarbaevqa Ankara qalasynda tamasha eskert­kish ornatylatynyn aıtqanda, men armanym júzege asatynyna qýan­dym. Qazaqta bir óleń bar eken: “Bir saýsaq tipti de, Ile almas jipti de!” – dep keletin. Bir Túrik mem­le­keti bir ǵana saýsaq, al 10 túrki memleketi yntymaqta bolsa, almas asýy, baǵyndyrmas bıigi bolmas edi ǵoı. Osyndaı izgi arman Atatúrikte bolǵan. Osyndaı izgi oıdy júzege asyrýda Nursultan Nazarbaev jolbasshylyq jasap otyr. Olaı bolsa Nursultan Nazarbaev – túrki memleketteriniń kóshbasshysy. Kóshbasshyǵa Ankarada tamasha eskertkish ornatylsa – oryndy-aq. ELBASY MEREII – EL MEREII Ońaıbaı KО́ShEKOV, Atyraý oblysynyń qurmetti azamaty. Qazaq pen túrik – túbi bir týys­qan halyq. Túrik memleketi qa­zaqty jatsynbady. Táýelsizdik al­ǵan sátimizde qazaqty baýyr tutyp, Qazaq eliniń derbestigin birinshi bolyp tanydy. Aldymen Túrkııa quttyqtady. Táýelsiz Qazaq elimen iskerlik, ekonomıkalyq baılanys ornatýdy da aldymen Túrkııa eli bastap edi. Túrkııanyń burynǵy pre­zıdentteri Turǵyt О́zal, Súleı­men Demırel qalyptastyrǵan osy bir týysqandyq, baýyrmaldyq baı­lanystyń kelisti kórinisi endi mine, Túrkııanyń Prezıdenti Abdýlla Gúldiń Qazaqstanǵa resmı sapary kezinde jańa qyrynan kórindi. Elbasy Nursultan Nazarbaev ta Túrkııamen týysqandyq qarym-qaty­nastyń ornyǵýyna múddelilik tanytyp keledi. Qazaq halqy da túrikti keýdesinen keri ıtermedi. Túrik baýyrlarymyzǵa elimizden jumys berip otyrmyz. Munaı-gaz ónerkásibi, qurylys ındýstrııasy salalarynda jumys isteıtin túrik baýyrlarymyz kóp. Osy arqyly bastapqyda Túrkııa Qazaqstanǵa, al endi ulttyq ekonomıkamyz ór­ken­degen tusta Qazaqstan Túrkııa eko­nomıkasyna qomaqty ınves­tı­sııa sala bastady. Rýhanı, mádenı áriptestik te aıryqsha qarqynmen damı túsýde. Túrkııanyń ulttyq kóshbasshysy Atatúriktiń kelbetti eskertkishi Astanada boı kóterdi. Bul – qazaqtyń túriktiń ulttyq kóshbasshysyna qurmeti. Túrkııa Prezıdenti Abdýlla Gúl baýyrymyz Tuńǵysh Prezıdentimiz Nursultan Nazarbaevtyń Qazaq­stan­dy ekonomıkasy qýatty, áleý­et­ti memleket retinde álem elde­rine, álem ekonomıkasyna kiriktirý ıdeıasyn qoldap, saıasatkerligine ár kez tánti bolatynyn jasyrǵan joq. О́tken jyly Nursultan Na­zar­baevty túrki elderin birik­tirýdegi qajyrly eńbegin baǵalap, túrki áleminiń kóshbasshysy degen ataqqa laıyq dep tanyǵan edi. Sol usynysyn kúni keshe er túriktiń altyn besigi – kıeli Túrkistanǵa sapary kezinde jáne bir ret qaı­ta­lap, aıǵaǵy retinde aıshyqty asa­taıaq usyndy. Endi Ankara qala­synda Tuńǵysh Prezıdentimiz Nur­sul­tan Nazarbaevtyń eskertkishi ashylatyndyǵyn jarııa etti. Bul – túrik halqynyń qazaq­tyń biregeı tulǵasy, Tuńǵysh Pre­zıdentimiz Nursultan Nazarbaevqa qurmeti. Elbasymyzǵa kórsetilgen qurmet – Qazaq eline qurmet. Elba­symyzdyń mereıi – elimizdiń mereıi. Elbasymyzdyń asqaq aby­roıy – elimizdiń abyroıy. Er tú­rik­tiń balalary mine, bir-birin osy­laı qoltyqtan demep, bir-birine laıyqty qurmet kórsetip, bir-biriniń mereıin tasytty. Bul – Pre­zıdentimiz Nursultan Nazar­baev­tyń álem tanyǵan saıasatker ekendiginiń taǵy bir bultartpas dáleli. KО́ŃILIMIZGE QÝANYSh UIаLATTY Únal О́ZTÚRIK, “KATEV” halyqaralyq qoǵamdyq qorynyń prezıdenti. Qazaqstan táýelsizdik alǵan kúnnen beri eki týystas el arasyn­daǵy mádenı, tarıhı jáne eko­no­mı­ka, bilim salasyndaǵy kúnnen-kúnge damyp kele jatqan tyǵyz baı­lanys osy sózimizdiń aıqyn dá­leli bolsa kerek. Kúni keshe ǵana saparmen Túr­kııa­nyń Prezıdenti Qazaqstanǵa kelgeninen barsha jurtshylyq habardar. Sapar barysynda Abdýlla Gúl myrza óz ultynyń jarqyn bolashaǵyna ólsheýsiz eńbek sińirgen túrik halqynyń súıikti perzenti Atatúriktiń Astana qalasyndaǵy eskertkishine taǵzym etti. Sondaı-aq Astana qala­syn­daǵy “Nur Orda” qazaq-túrik lı­seı-mektebine atbasyn tiredi. Soń­ǵy úlgide salynyp, ozyq tehnolo­gııalarmen qamtamasyz etilgen mektep qyzmetine dán rıza boldy. Túrkııa basshysy Astana qala­synda Atatúrikke arnap eskertkish ornatylýy – Qazaqstannyń Tuńǵysh Prezıdentiniń sarabdal saıasaty ekendigin atap ótti. Mundaı ótkenimizge kórsetilgen qurmet eki týys halyqtyń arasyndaǵy baıla­nysty odan ári damyta túsýine sebep bolatynyna senim bildirdi. Abdýlla Gúl myrza Túrkııanyń astanasy Ankara qalasynda Qazaq­stannyń Tuńǵysh Prezıdenti N.Á.Nazarbaevqa eskertkish orna­tylatynyn aıtty. Bul bizdiń kóńilimizge qýanysh uıalatty.