Qostanaılyq jolshylar Tájikstannyń 18 azamatyn tasjoldan evakýasııalady, dep habarlaıdy Egemen.kz.
«Jolshylar 10 qańtar kúni saǵat 8:30 shamasynda A22 «Qarabutaq-Qostanaı» kúre jolynda dızel otynymen júretin shaǵyn avtobýstan Tájikstan respýblıkasynyń 18 azamatyn evakýasııalady. Kómek kórsetilgenderdiń beseýi - bala. QazAvtoJol qyzmetkerleri shetel azamattaryn jylytý pýnktine jetkizip, ystyq tamaqpen qamtamasyz etti», delingen QazAvtoJol habarlamasynda.
Shaǵyn avtobýs A22 «Qarabutaq-Qostanaı» tasjolynda Aqtóbe oblysynan Tıýmen qalasyna qaraı bet alǵan. Kólik blokpostqa jetkende aldaǵy jol ýchaskesinde aýa temperatýrasynyń tómendeýine baılanysty dızelmen júretin kólikterdiń qozǵalysyna shekteý engizilgendigi anyqtaldy.
Jolshylar shaǵyn avtobýstaǵy dızel otynynyń qatýyna jol bermeý jáne adamdardyń qaýipsizdigin qamtamasyz etý maqsatynda Tájikstan azamattaryn jaqyn mańdaǵy jylytý pýnktine jetkizdi. Jolaýshylar kún raıy jaqsarǵansha jylytý pýnktinde boldy.
Qazirgi ýaqytta kún raıynyń jaqsaryp, tasjoldyń ashylǵandyǵyna oraı shaǵyn avtobýs saparyn jalǵastyrýǵa shyqty. Tájikstan azamattary qazaqstandyq jolshylarǵa kórsetken kómegi úshin alǵys bildirdi.