Qazirgi epıdemıologııalyq maýsymda tumaýratqandar sanynyń ósimi ótken maýsymmen salystyrǵanda 1,5 ese artyq delingen. Sonyń ishinde 14 jasqa deıingi balalardyń úlesi 65 paıyz bolǵan. Bıylǵy alǵashqy naýqas 14 qazanda tirkelgen.
Al jýyrda oblystyq sanıtarlyq-epıdemıologııalyq departament basshysynyń orynbasary Arman Kóshbasov byltyrǵy sáıkes merzimmen salystyrǵanda naýqastanǵandardyń bıylǵy ósimi 1,6 ese dep jarııalady. Sonyń ishinde 260 adam epıdemııalyq maýsym bastalǵan kezden tirkelgen. Olardyń arasynda 49-y – júkti áıel, 83-i – 14 jasqa deıingi balalar.
Naýqastardyń eń kóp shoǵyrlanǵan jeri – Petropavl qalasy. Barlyq naýqastyń 139 osynda tirkelgen. Aýdandar arasynda Qyzyljar men Shal aqynnyń árqaısysynda 20-dan naýqas tabylyp otyr. Barlyq tumaýratqan 262 adamnyń 245-i tumaýdyń V, al 17-si A túrimen naýqastanǵan. A.Kóshbasovtyń aıtýynsha, naýqastanǵandardyń bári de tumaýǵa qarsy ekpe almaǵandar.
«Qazir naýqastanǵandar sany óse túsýde. Halyqtyń óz densaýlyǵyna kóńil bólmeıtini bizdi alańdatady. Eger ekpe alǵandar kóp bolsa, naýqastyń sany da azaıar edi. Oblysta barlyq ekpe alǵan turǵyn sany – 75 myńdaı, bul – barlyq turǵynnyń 14 paıyzy ǵana, olardyń arasynan birde-biri aýyrǵan joq», deıdi maman.
Bir qyzyǵy jaman indet meńdep turǵan 2021 jyldyń dál osy merziminde tumaýratqandar sany 40 adam ǵana bolǵan. Al 2020 jyly tipti birde-bir adam tumaýratyp aýyrmaǵan eken.
Mamannyń aıtýyna qaraǵanda, halyq tumaýdan saqtaný úshin maskany durys qoldanýǵa, kópshilik jerde áleýmettik araqashyqtyqty saqtaýǵa, jeke gıgıenany umytpaýǵa shaqyrady.
Bıylǵy jaman indetke ushyraǵandar sany da ótken jyldyń sáıkes merzimimen salystyrǵanda ósip otyr. Ázirge 50-den artyq adam tirkelgen. Halqymyz «saqtansań saý bolarsyń» deıdi ǵoı, saqtanýdyń esh artyqtyǵy bolmaıdy.
Soltústik Qazaqstan oblysy