Memleket basshysy Parlament Májilisi jáne máslıhat depýtattarynyń kezekten tys saılaýyn taǵaıyndaý týraly málimdeme jasady, dep habarlaıdy Egemen.kz.
«Aldaǵy saılaýdyń zańǵa sáıkes ótýine, ádil ári ashyq bolýyna qatań baqylaý jasalady. Buǵan Ortalyq saılaý komıssııasy jáne Bas prokýratýra jaýapty.
Saılaý naýqanyn otandyq jáne halyqaralyq baıqaýshylar jiti qadaǵalaıdy. Osy tusta azamattarymyzdyń baıqaýshy retinde belsendilik tanytýy mańyzdy. Zańǵa saı barlyq kandıdat pen partııanyń buqaralyq aqparat quraldaryna shyǵýyna birdeı múmkindik beriledi», dedi Prezıdent.
Qasym-Jomart Toqaev osy saılaý naýqany elimizdegi saıası mádenıettiń joǵary ekenin aıqyn kórsetip, qoǵamymyzdy uıystyra túsedi degen senimi baryn aıtty.
«Biz damýdyń jańa dáýirine qadam bastyq. Qazaqstanda qarqyndy jáne jan-jaqty jańarý úderisi júrip jatyr. Bul saılaý qoǵamdaǵy ózgeristerdiń kórinisi retinde saıası júıemizdiń odan ári jańǵyrýyna zor yqpalyn tıgizedi. Qazir álemde dál osyndaı aýqymdy ózgeristerdi qolǵa alǵan memleketter kóp emes.
Májilis pen máslıhattar saılaýy memlekettik bılik ınstıtýttaryn jańǵyrtý jumystarynyń qorytyndy kezeńi bolmaq. Osylaısha, «Kúshti Prezıdent – yqpaldy Parlament – esep beretin Úkimet» qaǵıdaty tolyq iske asady», dedi Memleket basshysy.