Shyǵys Qazaqstan oblysynyń polıseıleri ınternet alaıaqtar tobyn ustady, dep habarlaıdy Egemen.kz Polisia.kz-ke silteme jasap.
Shyǵys Qazaqstan oblysy PD krımınaldyq polısııa basqarmasynyń qyzmetkerleri maqsatty is-sharalar ótkizý nátıjesinde 2022 jyldyń qańtarynan bastap ınternet jelisi arqyly alaıaqtyqpen aınalysqan qylmystyq topty ustady.
Bıylǵy jyldyń 19 qańtarynda tártip saqshylary О́skemen qalasynda qylmystyq áreketti uıymdastyrǵan adamdy ustaǵan, ol 28 jastaǵy qala turǵyny bolyp shyqty. Sondaı-aq onyń 22 jáne 27 jastaǵy kómekshileri bolǵany anyqtaldy.
Kúdiktiler Instagram áleýmettik jelisinde jalǵan «bir kúndik» akkaýnt ashyp, onda «onlaın nesıe resimdeýge kómek» týraly habarlandyrýlar ornalastyrǵan. Ári qaraı jalǵan habarlamaǵa aldanǵan tulǵalardyń atyna taýarlyq kredıtter resimdelgen. Qazirgi ýaqytta Qazaqstannyń ártúrli óńirlerinde jáne Shyǵys Qazaqstan oblysynda turatyn 109 jábirlenýshi anyqtalǵan.
Kúdiktilerdiń turǵylyqty jerine tintý is-sharalaryn júrgizý barysynda teńgerimine 60-tan astam tulǵalardan tolyqtyrýlar jasalǵan uıaly telefondar, túrli bankterdiń banktik kartalary, uıaly baılanys operatorynyń Simply kartalary tárkilengen.
Jedel-tergeý is-áreketterin júrgizý barysynda olar qylmys jasaý úshin 253 mobıldi qurylǵy men uıaly operatorlardyń 573 abonenttik nómirin paıdalanǵany anyqtaldy.Sonymen qatar júrgizilgen tergeý áreketteri barysynda kúdiktiler jábirlenýshilerge nesıe retinde resimdelgen teledıdar, planshet, uıaly telefondardy О́skemen qalasynyń lombardtary men komıssııalyq dúkenderine ótkizgenderi anyqtaldy, polısııa ótkizilgen taýarlardyń jazbalary bar jýrnaldar sııaqty zattaı dáleldemelerdi tárkiledi.
Krımınaldyq polısııa qyzmetkerleri osyndaı qylmystarǵa qatystylyǵyn anyqtaý maqsatynda basqa oblystarǵa baǵdar joldady.
Kúdiktilerge qatysty QR QQ-niń 190-baby 3-bóligi 4-tarmaǵy (alaıaqtyq) boıynsha sotqa deıingi tergeý bastaldy. Tergeý is sharalary jalǵasyp jatyr.