Túrkistanda Ortalyq Azııa memleketteriniń birinshi parlamentaralyq forýmy ótedi. Bul týraly QR Syrtqy ister mınıstrligi habarlady, dep jazady Egemen.kz.
«2023 jyldyń 9-10 aqpany aralyǵynda Túrkistan qalasynda Ortalyq Azııa memleketteriniń birinshi parlamentaralyq forýmy ótedi. Is-shara Ortalyq Azııa memleketteri basshylarynyń ótken jyldyń shildesinde Sholpan-Ata qalasynda (Qyrǵyzstan) ótken tórtinshi konsýltatıvtik kezdesýiniń qorytyndysy boıynsha qol jetkizilgen ýaǵdalastyqtardy iske asyrý sheńberinde ótkiziledi», dedi QR SIM resmı ókili Aıbek Smadııarov.
Ol aldaǵy Parlamentaralyq forýmǵa Ortalyq Azııa memleketteriniń zań shyǵarýshy organdarynyń spıkerleri men depýtattarynyń qatysýy josparlanyp otyrǵanyn atap ótti.
«Atalǵan parlamentaralyq forýmdy ótkizý Ortalyq Azııa elderiniń zańnamalyq organdary jelisi boıynsha memleketaralyq yntymaqtastyqty nyǵaıtý úshin qosymsha platforma qurý prosesin bastaýǵa múmkindik beredi. Forým qorytyndysy boıynsha Túrkistan deklarasııasyn qabyldaý josparlanyp otyr», dedi Aıbek Smadııarov.