L.N.Gýmılev atyndaǵy Eýrazııa ulttyq ýnıversıtetinde jastardy áleýmettendirýge arnalǵan forým ótti. Eki kúnge sozylǵan is-sharaǵa Ǵylym jáne joǵary bilim mınıstri Saıasat Nurbek jáne joǵary oqý oryndarynyń ókilderi men stýdentter qatysyp, salaǵa qatysty ózekti máselelerdi talqylady.
Mınıstr ózi basqaryp otyrǵan vedomstvo aldynda turǵan bilim berýdiń qoljetimdiligi, joǵary oqý oryndarynyń ınfraqurylymy, ınklıýzıvti bilim berý, sıfrlandyrý sekildi negizgi taqyryptarǵa toqtaldy.
– Mınıstrliktiń basty baǵyttarynyń biri – joǵary bilimge degen qoljetimdilikti saqtaý. Bul másele nege ózekti? О́ıtkeni elimizdegi demografııalyq ósimniń qarqyny joǵary. Máselen, stýdentter sany 2025 jylǵa qaraı 626 myńnan 800 myńǵa deıin ósse, 2030 jyly olardyń sany 1 mln-nan asady. Grant sany jyl saıyn 10 myńǵa artyp keledi. 2030 jylǵa qaraı shákirtaqy mólsheri 100 paıyzǵa ulǵaıady. Sondaı-aq demografııalyq ósimge baılanysty qosymsha qoldaý tetikterin qarastyrý kózdelip otyr. Búginde stýdenttik jataqhanalardyń jetispeýshiligi de ózekti máseleniń biri. Joǵary oqý oryndarynda 87 myń tósektik oryn tapshylyǵy baıqalady. Byltyr biz bul kórsetkishti 75 myńǵa deıin tómendete aldyq. Qazir qurylys salýshylar úshin memlekettik tapsyrys sharttaryn qaıta qaradyq. Endi bilim berýdegi úlken qurylys dáýiri bastalady, – dedi S.Nurbek.
Sonymen qatar mınıstr ınklıýzıvti bilim berýdi damytý jónindegi tujyrymdama men jol kartasyn daıyndaý týraly aıta kelip, joǵary oqý oryndary men ǵylymı-zertteý ınstıtýttarynda ınklıýzıvti bilim berýdiń qoljetimdiligi tómen ekenin aıtty.
– Joǵary oqý oryndarynyń ınfraqurylymyn keńeıtý qajet. Osy baǵytta sheteldik ýnıversıtetter, eldegi kampýs fılıaldaryn salý úshin ınvestorlar tartylýda. Mundaı joǵary oqý oryndarynyń óńirlerdegi fılıaldary elimizdiń túkpir-túkpirinen ǵana emes, sonymen birge Reseıdiń jaqyn aımaqtarynan da stýdentter tartady. Aldaǵy jeti jyl ishinde Qazaqstanda sheteldik joǵary oqý oryndarynyń 12-13 fılıaly ashylady, – dedi mınıstr.
Vedomstvo basshysy óńirlerde jańa kásipter atlasyn engizý týraly da sóz qozǵady. «Biz qazir atlastardy óńirlik etip jatyrmyz, óıtkeni óńirlik ekonomıkanyń ózindik erekshelikteri bar. Bes oblysta mundaı atlastar iske qosyldy. Biz aımaqtyq ýnıversıtetterdiń qyzmetkerlerin sertıfıkattaýǵa úıretemiz», dep naqtylady ol.
Mınıstrlik ǵylymnyń damýyna erekshe nazar aýdaryp otyr. S.Nurbektiń aıtýynsha, aldaǵy úsh jylda ǵylymdy qarjylandyrý 3,5 ese artpaq.
Forým aıasynda Ǵylym jáne joǵary bilim mınıstriniń ınklıýzıvti bilim berý máseleleri jónindegi keńesshisi Tańsáýle Serikov ınklıýzıvti bilim berýdiń erekshelikterine toqtalsa, Batyrhan Beısembekov, Oleg Shıshaskıı sekildi stýdentter ózderin tolǵandyrǵan oı-pikirlerin ortaǵa saldy. Densaýlyq saqtaý mınıstrligi Respýblıkalyq psıhıkalyq densaýlyq ǵylymı-praktıkalyq ortalyǵynyń basqarma basshysy Aıgúlim Ábetova stýdentterdiń psıhıkalyq densaýlyǵyn saqtaý jáne L.N.Gýmılev atyndaǵy Eýrazııa ulttyq ýnıversıtetiniń Áleýmettik-mádenı damý jónindegi prorektory Lázzat Nurqatova stýdentterdiń daryndylyǵyn basqarýdyń ulttyq modeli taqyrybynda baıandama jasady. Is-sharada stýdenttik startaptar, joǵary oqý oryndarynda nashaqorlyqtyń aldyn alý jáne jastar arasynda salamatty ómir saltyn damytý sekildi máseleler de sóz boldy.