Qyzylordadaǵy «Qosyl» qalalyq jastar resýrstyq ortalyǵy ótken jyly 143 is-shara uıymdastyryp, oǵan 10 myńnan astam jas qatysypty. Jastardyń suranysyna oraı jabdyqtalǵan ortalyq qyzmetin 11 myńnan astam adam paıdalanǵan. Mundaǵy WI-FI, kovorkıng ortalyǵy, sporttyq seksııalar, kreatıv foto-beıne stýdııasy, bı zaly jáne jastar uıymdary kabıneti tegin qyzmet kórsetedi.
О́tken jyly qala ákiminiń «Samǵaý» jastar syılyǵy negizinen kásiptik-tehnıkalyq baǵyttarda qyzmet etetin sala jastaryna tabystaldy. Sonymen qatar qalalyq jastar resýrstyq ortalyǵy elimizde mobılografııanyń negizin qalaýshylardyń biri Qyran Talapbektiń qatysýymen oblysta alǵash ret «Mobılografııa» festıvalin uıymdastyrdy.
– Qatarlastarymyzdyń bos ýaqytyn tıimdi ótkizip, salamatty ómir saltyn ustap, buqaralyq sportpen aınalysýy úshin qalanyń shet aımaqtary men oblys ortalyǵyna qarasty aýyldardan ortalyqtar ashyldy. Qazir Qaraýyltóbe, Aqsýat, Aqjarma, Qyzyljarma, Talsýat, Qyzylózek aýyldyq okrýgteri jastary ústel tennısimen aınalysady. «Aýla klýbtary» áleýmettik jobasy aıasynda ótken jyldyń sońynda Tasbóget kentinde alǵashqy aýla klýby jumysyn bastady. Aldaǵy ýaqytta osyndaı klýbtardy Belkól kenti men Shanhaı aýdandarynan ashýdy josparlap otyrmyz, – deıdi «Qosyl» qalalyq jastar resýrstyq ortalyǵynyń jetekshisi Álibı Basarov.
Jazda qaladaǵy Arbat boıynda ár aptanyń beısenbisinde «Ping-Pong», juma kúni «Karaoke Battle», senbide «Kıno TIME» jobalary ótkizildi. Jastar ortalyǵynyń «Qosyl kenes» jobasy arqyly jastarǵa úzdiksiz keńes berilip, «Qosyl acoustic» jobasy sheńberinde aı saıyn án keshi ótkizilip keledi.
Jýyrda oblys ortalyǵynan «Orta» rýhanı-ıntellektýaldy demalys orny ashyldy. Zamanaýı úlgidegi jabdyqtalǵan bul ortalyqta túrli ústel oıny, ıntellektýaldy saıystar, jandy daýysta ánder shyrqalatyn merekelik keshter uıymdastyrylady.
Sonymen qatar munda kitap buryshy, májilis zaly, balalarǵa arnalǵan logoped kabıneti men toǵyzqumalaq, shahmat úıirmeleri jumys isteıdi.
Qyzylorda