Almatydaǵy Ortalyq memlekettik mýzeı alǵash ret dámi til úıiretin tátti torttardyń toptamasyn kópshilikke tartý etti. «Tort mýzeıi» atalatyn kórmede barmaǵynan almatylyq bal tamǵan kondıterlerdiń eksklıýzıvti avtorlyq torttary toptastyrylǵan. Kórmege qatysqan jergilikti sheberler túrli dızaındaǵy, alýan pishin men ólshemdegi 40-tan astam torttyń túrin jasaýǵa nıet bildirip, táttini naǵyz óner týyndysyna aınaldyrǵan.
Mysaly, «Belosnejka» atalatyn shedevrdi ázirleý úshin Inga Nıkýlıcheva tórt táýlik ýaqytyn jumsaǵan. Ol – áýesqoı kondıter. Quramyna qamyr, karamel, jemis-jıdek, qant qosylǵan tortty daıyndaý úshin 35 myń teńgesin jumsaǵan, alaıda bólgen ýaqytyn, eńbegin, shyǵarmashylyq izdenisin eseptegende, pisirgen tortynyń naryqtaǵy baǵasy 100 myń teńgege jýyqtaıdy. «Alısa ǵajaıyptar elinde» – eń súıikti ertegilerimniń biri, bul ónermen aınalysqanyma kóp bolmasa da, aldymen meni tánti etken Belosnejka beınesin daıyndaýdy uıǵardym», deıdi Inga. Qazir ol kondıter-dızaınerlerdiń halyqaralyq baıqaýyna qatysýǵa daıyndalyp júr.
16 sáýirge deıin sozylatyn kórmege kelip táttilerdi tamashalaıtyndar torttardyń tarıhy týraly qyzyqty málimetterge qanyq bolyp, tortpen baılanysty qyzyqty ınteraktıvti baǵdarlamalarǵa qatysady. Sondaı-aq munda balalar tortpen baılanysty oıyn oınap, sýretke túsip, ýaqytyn qyzyqty ótkizýge, dám tatyp, sheberlik synybyna qatysýǵa múmkindik alady. Sheberlik synybynda aspazdar árbir kelýshige mastıkpen sándep, óz shaǵyn tortyn ázirleýge kómektesedi, kúrdeli resepterdi jeńil ázirleýdiń qyr-syryn úıretedi.
Taǵam tarıhyn zertteýshiler torttyń paıda bolýy týraly túrli boljam aıtady. Olardyń biri tortty torta – «dóńgelek nan» degen maǵynadaǵy ıtalıan sózimen baılanystyrady. Tort búgingi Italııanyń aýmaǵynda 2000 jyl buryn paıda bolǵan dese, keıbir zertteýshiler Grekııany torttyń otany sanaıdy. Ertedegi aspazdar torttyń salmasy men bezendirýine jańǵaq, kepken jemis pen baldy paıdalana otyryp, qaınatylǵan dánniń ezbesinen daıyndasa, Shyǵys áıelderi sút pen kúnjit qosyp pisirgen. Alaıda tort qandaı qospamen ázirlense de, bal tatyǵan tátti dáminen ajyramaıdy.
ALMATY