Soltústiktiń dalalarynda qar áli siresip jatyr. Taza aýa jutqysy kelgen, shańǵy tebýge qumar adamdarǵa bul – naǵyz tamasha ýaqyt. Shaqyraıǵan kúnge shaǵylǵan appaq qar, ashyq aspan, jylymyq aýa, keń dala tynysyńdy ashyp, keýdeńe saf aýanyń nury quıylyp beredi.
Dala osyndaı bolǵanda qala men basqa da eldi mekenderde shaqyraıǵan kóktem kúni juqa qarlardy jibitip, kóshelerde kúndiz kólkigen sýdy da kórip qalasyz. «Túske deıin múıiz, tústen keıin kıiz» demekshi, keshegi erigen qar túske deıin qatyp, kóktaıǵaq qylyp jatady, al tústen keıin qaıta jibip, kúnnen-kúnge qyzǵan sáýle qardy jemirip, áketip jatyr.
Jekemenshik úılerdiń ıelerine kúrt erigen qardan qarǵyn sýdyń astynda qalmas úshin aýlalaryndaǵy qardy kóshege shyǵarý máselesi kópten beri aıtylyp keledi. Kommýnaldyq qyzmetterdiń aıtýyna qaraǵanda bıylǵy kóktem bastalǵaly 320 myń tonna qar syrtqa tasylypty. Bul jumystar ásirese úılerin qarǵyn sý basý qaýpi basym qalanyń «Jumysshy kenti» aýdanynda qyzý júrgizilip jatyr. Sonyń ishinde «Blagoýstroıstvo Sever» JShS bastyǵy Anar Burhanovtyń aıtýyna qaraǵanda, 9 naýryzdan beri kún saıyn 11 myń tekshe metr qar shyǵarylady eken. «Bul iske ázirge 110 arnaýly tehnıka jumyldyryldy», deıdi ol. Biraq bul aýdannan basqa shetkeri aımaqtarǵa áli qar tasý kele qoıǵan joq.
Qazir Tótenshe jaǵdaılar departamenti daladaǵy mol qardyń shaǵyn ózenderdiń jaǵalaýyndaǵy eldi mekenderge zardabyn tıgizbeý jaıyn oılastyrýda. Jazdy kúnderi kózge ilinbeı, kóbi qurǵap qalatyn osy shaǵyn ózenderdiń de zardaby keı kóktemderge soıqan bolady. О́ıtkeni qary juqa jerlerdiń muzy tez erip aǵady da qalyń muzǵa kelgende sýy keptelip, aǵys taba almaı aınalanyń bárine jaıylady. Sondyqtan departament qyzmetkerleri qalyń muzdy aldyn ala jaryp, sýdyń bógelmeı, aǵyspen aǵýyn qamtamasyz etýge tyrysady. Osy jumyspen aınalysatyn «Kókshe-Býr» JShS jýyrda ǵana Qýlykól selosynyń mańynda Sileti ózeniniń muzyn jarylǵysh zattarmen bólshektep tastady. Uzyn sany tórt ýchaskede jasalǵan jarylys 1 myń sharshy metr aýmaqty qamtydy. «Bul da – apatty jaǵdaıdyń aldyn alýǵa arnalǵan jumystar. Osy ádispen siresken qalyń muzdy talqandasaq, aǵyn sý bógelmeı, óziniń arnasymen kete beredi. О́zenniń sýy arnasynan aspaıdy. Sóıtip, jaǵalaýdaǵy eldi mekenderdi sý basý qaýpin azaıtamyz», deıdi TJ eskertý bóliminiń bastyǵy Sáken Aǵzamov.
Qutqarýshylar eldi meken turǵyndaryna jarylystyń mánisin aldyn ala aıtyp, habarlandyrǵan. Áıtpese jaqyn mańnan shyqqan gúrsildiń qýaty osal emes, júregi osal adamdarǵa zııan shektirýi ábden múmkin. Sonymen birge jarylys bolmaǵan jerlerde de muzdyń jarylýy baıqalýy múmkin. Sondyqtan balyqshy qaýymǵa da aldyn ala eskertýler jasalǵan.
Sınoptıkterdiń habarlaýyna qaraǵanda, bıylǵy kóktem jyldaǵydan 5-7 kúnge erte shyǵatyn túri bar. Naýryzdyń sońǵy onkúndiginde aýanyń temperatýrasy kúrt kóterilýi múmkin.
Soltústik Qazaqstan oblystyq TJD bastyǵy, polkovnık Ramıl Kamalov te osy kúnderi tynym tappaı sý basý qaýpi basym aýdandardy aralap, tasqynǵa qarsy tosqyn jumystarynyń sapasyn tikeleı ózi baqylaýǵa aldy. Jýyrda ol Ǵ.Músirepov aýdanyna baryp, aýdan ákimi Serik Muhamedıevtiń aldynda barlyq aýyldyq okrýg ákimderi, mekeme-uıymdar ókilderi men tótenshe jaǵdaı qyzmetkerleri qatysqan keńeske qatysty. Keńeste kóktemgi tasqynnyń qaýipsiz ótý máseleleri talqylandy. Sonymen birge qandaı sharalardyń jasalý kerektigi pysyqtaldy. 2021-2022 jylǵy maýsymda bul aýdanda qaterli jaǵdaı bolmaǵan, alaıda saqtyqta qorlyq joq ekendigi eskertildi. Sol kúni R.Kamalov pen aýdan ákimi S.Muhamadıev Rýzaev, Sıvkov, jáne Chıstopol aýyldaryna baryp, Sharyq, Jembaraq, Aqan-Burlyq sııaqty shaǵyn ózenderdiń arnalaryn, ondaǵy qardyń qalyńdyǵyn, qaýpin jáne osy ózenderdiń jaǵasyndaǵy eldi mekenderdiń tasqynnyń aldyn alýǵa tıisti ınjenerlik jabdyqtarynyń jaı-kúıin baǵalady. Sonymen birge aýdandaǵy jedel áreket etýshi toptyń daıyndyǵy da tekserilip, qutqarýshylardyń óz mindetterin bilýi synaldy.
Soltústik Qazaqstan oblysy