Keshe Premer-Mınıstrdiń birinshi orynbasary О́mirzaq Shókeevtiń tóraǵalyq etýimen Keden odaǵy máselelerine arnalǵan dóńgelek ústel bolyp ótti. Oǵan Ekonomıkalyq damý jáne saýda mınıstri Janar Aıtjanova, Qarjy mınıstri Bolat Jámishev, Parlament depýtattary jáne birqatar vedomostvolar men isker top ókilderi qatysty.
Otyrysta О́.Shókeev elimiz azamattarynyń jeńil avtokólikterdi tasymaldaý kezinde Belarýstegideı jeńildikti rejim jumys isteıtinin, qazaqstandyqtar úshin jeńil avtokólikterdi tasymaldaý jeńildikti rejim arqyly iske asyrylatyndyǵyn aıtty. Bizdińshe, bul jan-jaqty oılastyrylǵan is. Atalmysh rejim jańa ári qymbat avtokólikti alýǵa múmkindigi az azamattar úshin qolaıly bolmaq, dedi ol. Bul rejim avtokóliktiń jylyna jáne qozǵaltqysh kólemine qaraı ıkemdi stavkalardy qarastyrady. Sondaı-aq, 3-10 jyl merzimde shyǵarylǵan avtokólikter úshin jeńildikti stavkalar belgilenbek.
Qaraǵandy aýmaǵynda avtokólik qurastyrýǵa arnalǵan zaýyt boıynsha búginde marketıngtik sharalar júrgizilýde. О́.Shókeevtiń aıtýynsha, Reseı tarapy bul máseleni taǵy bir márte pysyqtap ótken.
Qazirgi kezde avtokólik qurastyrý zaýytynyń arnaıy kestesin bekitý sharalary júrgizilýde eken. 50 myń avtokólik shyǵarýǵa arnalǵan bul zaýyt Qaraǵandy aýmaǵynda ornalasatyn bolady.
Qazirgi tańda marketıng júrgizilýde jáne qandaı markany shyǵarý máselesi naqtylaný ústinde. О́.Shókeevtiń pikirinshe, munda 50 myń avtokólik qurastyrylatyn bolsa, bul kórsetkish rynoktyń eleýli bóligin qamtamasyz etýge múmkindik bermek.
Keden odaǵyn qurý boıynsha prezıdentterdiń qorytyndy kezdesýi shildeniń basynda Astanada ótetindigi de osy basqosýda aıtyldy. “Kelissózderdiń sońǵy kezeńi maýsymnyń 17-18-i kúnderi, ıaǵnı Keden odaǵy komıssııasynyń qorytyndy otyrysy barysynda ótedi. Osydan soń shildeniń basynda Prezıdentter jınalyp, barlyq úderister boıynsha sońǵy núkteni qoıady”, dedi Úkimet basshysynyń birinshi orynbasary.
Ábdirahman QYDYRBEK.