Balqash aýdanynyń jáne Almaty oblysynyń qurmetti azamattary boıaýlylyq Baltaǵul Moldaqasymov pen birliktik Ábdijappar Qystaýbaevtyń jasap jatqan tirlikterine janyń súısinedi. Baltaǵul Moldaqasymov tarap ketken Boıaýly aýyly turǵyndarynyń basyn qurap, olardyń eshqaıda kóshpeı, sol aýylda ornyǵyp qalýlaryna jan-jaqty jaǵdaı jasady. Árbir úıge óz qarajaty esebinen ystyq-sýyq sý kirgizip berip, jýynatyn dýsh ornatty. Bir-bir bólme qostyrtyp, ájethana jasattyryp berdi. Kósheleriniń barlyǵyn jaryqtandyrdy. Meshitti qaıtadan kúrdeli jóndeýden ótkizip, óskeleń talapqa saı, sáýletti etip jasady. Qazir meshittiń janynda mal shalatyn arnaıy oryn, qudaıy tamaq beretin ashana bar. Boıaýlylyqtar onda jıi bas qosady.
Bastaýysh mektep ǵımaratyn da óz qarajaty esebinen salyp berdi. Al, Áben Qystaýbaev tarap ketken «Birlik» sovhozyn shashaý shyǵarmaı, «Birlik» agrofırmasy etip qaıta uıymdastyrdy. Aýyl turǵyndarynyń barlyǵyn jumyspen qamtydy. Olar eńbekaqylaryn ýaqytynda alyp turady. Aýyl tazalyǵyna da basa mán beredi. Jasyl jelekke jamylǵan Birlik aýyly búl kúnde kúnnen-kúnge kórkeıip, jańa talaptarǵa saı sáýlettene túsýde. Aýyldyń árbir turǵynynyń qýanyshy men qaıǵysyn bólisip, bel ortasynda júretin Ábdijappar Qystaýbaevty aýyldastary shynaıy qurmettep qana qoımaı, ony maqtan etedi.
Ekeýi de aýdan kóleminde uıymdastyrylatyn kóptegen mádenı, áleýmettik máni bar sharalarǵa belsene aralasady. Olar ǵasyr sańlaǵy, asa kórnekti memleket jáne qoǵam qaıratkeri D.A.Qonaevtyń júz jyldyq torqaly toıyn ótkizýge de belsene atsalysqan bolatyn. Alǵashqylardyń biri bolyp, Dinmuhamed Ahmetulynyń toıyn ótkizý úshin arnaıy qurylǵan qorǵa bir mıllıon teńgeden óz qoldarymen ákelip quıǵan-dy.
Kabınetimde otyr edim, Balatekeń ákelip bir mıllıon teńgeni qorǵa qosqanym, dep aldyma qoıa salǵanda ondaı myrzalyqty kútpegendikten be, esim shyǵyp ketti, dep áńgimeleıdi aýdandyq aýrýhanany 42 jyl basqarǵan Turlan Esimqulov. Áben de bir mıllıon teńgeni qolma-qol quıdy. Onyń ústine, jetpeı jatyr degenimizde jylqy da berdi. Usaq-túıek nárselerge kómektesken kezderin aıtyp taýysa almaımyz, dep Látip Nurtaev ta aǵynan jaryldy. Almaty oblysynyń qurmetti azamaty ataǵy berilgen kúnniń ertesine olarǵa arnap qor esebinen dastarqan jaıyp, ústilerine shapan japty. Dastarqan ústinde qor músheleri, Balqash aýdanynyń qurmetti azamattary A.Esimov, J.Jumadilov, A.Beısenbaeva, B.Ádilhanova, obaǵa qarsy kúres mekemesiniń bastyǵy A.Álipbaev eki azamatqa arnap, kókeılerinde júrgen jaqsy tilekterin aıtyp, qoshemet kórsetti.
Marat QAShQYNBAEV.
Almaty oblysy,
Balqash aýdany.