Ulttyq ulannyń «Shyǵys» óńirlik qolbasshylyǵyna qarasty 6679 áskerı bóliminiń jeke quramy alǵashqylardyń biri bolyp daýys berdi. Áskerı bólimdegi saılaý ýchaskesi ashyla sala, Otan aldyndaǵy boryshyn ótep júrgen barlyq qatardaǵy jaýyngerler daýys berýge sappen keldi, dep habarlaıdy Egemen.kz.
Bólim komandıriniń orynbasary, maıor Nurlan Bashenovtiń aıtýynsha, áskerı bólimdegi saılaý ýchaskesinde daýys berýshilerdiń belsendiligi óte joǵary. Áskerı qyzmetshilerdiń jeke quramy ǵana emes, olardyń otbasy da saıası naýqanǵa túgel qatysqan.
«Ulttyq ulan áskeri - elimizdiń tynyshtyǵy men turaqtylyǵyna jaýapty. Qandaı da bir jaǵdaı bolmasyn olar quqyqtyq tártipti qadaǵalap, joǵary azamattyq jaýapkershilik pen bıik patrıottyq rýhty kórsete biledi. Búgin de ár áskerı qyzmetshi, ár jaýynger saıası naýqanǵa belsendi qatysyp, saılaýǵa qoldaý kórsetýde», dep atap ótti ol.
Áskerı boryshyn ótep júrgen sarbazdar men qyzmettegi sardarlardyń saıası naýqanǵa qatysýyna tolyq múmkindik jasalǵan. Jaýyngerlerdiń arasynda saıası naýqanǵa birinshi ret qatysyp otyrǵandar da bar. Máselen, jas sarbaz Asylhan Artyqbekov QR Ulttyq ulan sapynda qyzmet atqara júrip, búgin birinshi ret daýys bergenin aıtady.
«Alǵash ret bolǵan soń tolqý boldy. Saılaýǵa qatysý árbir azamattyń boryshy dep bilemin. Azamattyq ustanymymdy bildirip, eldiń damýyna óz úlesimdi qostym dep esepteımin. Bul Qazaqstannyń bolashaǵyn sheshý úshin mańyzdy qadam bolmaq. Sondyqtan óz daýsymdy ózim qalaǵan partııaǵa berdim», deıdi jas sarbaz.