Búgin elimizde QR Parlametiniń Májilisi men máslıhattarǵa depýtattardy kezekten tys saılaý kúni bastaldy. Ulttyq ulannyń áskerı qyzmetshileri el taǵdyryna baılanysty mańyzdy oqıǵadan tys qalmady. Osy ýaqytta Ulttyq ulannyń barlyq jeke quramy óz daýystaryn berdi, dep habarlaıdy Egemen.kz.
Saǵat 6:00-de 5573 áskerı bólimindegi №226 daýys berý ýchaskesine alǵashqylardyń biri bolyp Ulttyq ulan Bas qolbasshysynyń tárbıe jáne áleýmettik-quqyqtyq jumys jónindegi orynbasary polkovnık Qaırat Úmbetov kelip, óz daýysyn berdi.
«Barlyq ýaqytta quqyqtyq tártip áskerleriniń áskerı qyzmetshileri joǵary azamattyq jaýapkershilik pen patrıottyq rýhty kórsetedi. Ulttyq ulan elimizdiń tynyshtyǵy men turaqtylyǵyna jaýap beredi. Búgin árbir áskerı qyzmetshi belsendi qatysyp, daýys beretinine senimdimin», dedi polkovnık Qaırat Úmbetov.
QR Ishki ister mınıstriniń orynbasary – Ulttyq ulannyń Bas qolbasshysy general-maıor Erkin Botaqanov áskerı bólimge kelip, jeke quramnyń daýys berý barysymen tanysty. Ol daýys bergennen keıin jeke quramǵa oraldy. Sondaı-aq ol Bas qolbasshylyqtyń arnaıy shtabynyń qyzmet atqarýyn tekserdi. Onyń aıtýynsha, áskerı bólimderde ashylǵan saılaý ýchaskelerinde daýys berýshilerdiń belsendiligi óte joǵary boldy. Saılaýǵa tek áskerı qyzmetshilerdiń ózderi ǵana emes, olardyń otbasy músheleri de belsendi qatysqan.
Áskerı bólimderdiń merzimdi qyzmetiniń áskerı qyzmetshileri men Ulttyq ulan Akademııasynyń kýrsanttary áskerı qalashyqtar aýmaǵyndaǵy 36 saılaý ýchaskesinde daýys berdi. Áskerı qyzmetshilerdiń arasynda alǵash ret daýys berýge qatysqandar kóp. Áskerı bólimderdegi alǵashqy saılaýshylarǵa arnaıy syılyqtar tabystaldy.