Prezıdent Qazaqstan Respýblıkasy Úkimetiniń ókilettigin toqtatý jónindegi jarlyqqa qol qoıdy. Alaıda Úkimet jańa quram bekitilgenge deıin óz mindetterin atqarady, dep habarlaıdy Egemen.kz Aqordanyń baspasóz qyzmetine silteme jasap.
Qazaqstan Respýblıkasy Konstıtýsııasynyń 70-babynyń 1-tarmaǵyna, «Qazaqstan Respýblıkasynyń Úkimeti týraly» Qazaqstan Respýblıkasy Konstıtýsııalyq zańynyń 4-babyna sáıkes jańadan saılanǵan Qazaqstan Respýblıkasy Parlamenti Májilisiniń aldynda Qazaqstan Respýblıkasy Úkimetiniń ókilettigin doǵarýyna baılanysty QAÝLY ETEMIN:
1. Qazaqstan Respýblıkasy Úkimetiniń jańa quramy bekitilgenge deıin Qazaqstan Respýblıkasynyń Úkimeti óz mindetterin atqaratyn bolsyn.
2. Osy Jarlyq qol qoıylǵan kúninen bastap qoldanysqa engiziledi.
Qazaqstan Respýblıkasynyń
Prezıdenti Q.Toqaev
Astana, Aqorda, 2023 jylǵy 29 naýryz
№ 158