Bıyl taǵy 1,5 myńnan astam jobaǵa bıýdjetten 143 mıllıard teńge bólinedi. Bul týraly Prezıdent VIII saılanǵan QR Parlamentiniń birinshi sessııasynda aıtty, dep habarlaıdy Egemen.kz.
«Men saılaý aldynda aýyldaǵy kásipkerlikti damytý qajettigi týraly anyq aıttym. Bıyl taǵy 1,5 myńnan astam jobaǵa bıýdjetten 143 mıllıard teńge bólinedi. Bul – mańyzdy mindettiń biri. Ony aýyl sharýashylyǵy kooperasııasy arqyly júzege asyrý kerek. Sol úshin «Aýyl amanaty» jobasy qolǵa alynady. Aýyl turǵyndaryna 5-7 jylǵa jyldyq ósimi 2,5 paıyz bolatyn shaǵyn nesıe beriledi», dedi Prezıdent.
Aýyl sharýashylyǵy kooperatıvteri halyqqa qyzmet kórsetý jáne ónim ótkizý úshin qurylady. Olarǵa qural-jabdyq jáne tehnıka satyp alý úshin sýbsıdııa beriledi. Osy maqsatqa 1 trıllıonǵa jýyq teńge bólinedi.
«Aýyl – el besigi», «Aýyl amanaty» jobalary aýyldy damytýǵa arnalǵan jańa tujyrymdamaǵa arqaý bolýǵa tıis. Topyraqtyń qunaryn saqtap, ony jaqsartý úshin júıeli sharalar qabyldaý qajet. Aýyl sharýashylyǵy jerlerin tıimdi paıdalaný úshin baqylaýdy kúsheıtý mańyzdy. О́nim kólemin arttyrýǵa jáne ony ártaraptandyrýǵa basa mán bergen jón. Aýyl sharýashylyǵy salasyndaǵy reformalarǵa sapaly zańdar qajet. Bul jumysqa Májilisten oryn alǵan «Aýyl» partııasy óz úlesin qosady dep senemin», dedi el Prezıdenti.