Elnur Beısenbaev Májilistegi «Amanat» partııasy fraksııasynyń jetekshisi bolyp saılandy. Jıyn barysynda onyń kandıdatýrasyn partııa tóraǵasy Erlan Qoshanov usynǵan, al depýtattar qoldaý bildirdi, dep habarlaıdy Egemen.kz.
Elnur Beısenbaev ár jyldary Almaty qalasy ákimdiginiń Jastar saıasaty máseleleri basqarmasynyń basshysy, Astana qalasy ákiminiń keńesshisi, Nur Otan partııasy janyndaǵy Jas Otan jastar qanatynyń tóraǵasy laýazymdaryn atqardy. Ol sondaı-aq Parlament Májilisiniń VII shaqyrylym depýtaty boldy.
Bıylǵy 4 qańtardan bastap «AMANAT» partııasynyń Atqarýshy hatshysy qyzmetin atqaryp keledi.
Eske sala keteıik, Parlament Májilisi depýtattarynyń kezekten tys saılaýynyń qorytyndysyna sáıkes, «AMANAT» partııasy saılaýshylardyń 53,9% daýysyn jınady. Bul 40 depýtattyq mandatqa sáıkes keledi. Parlamenttiń tómengi palatasyndaǵy Amanat partııasy fraksııasynyń jańa quramyndaǵy áıelder, 35 jasqa deıingi jastar jáne erekshe qajettilikteri bar adamdardyń úlesi 32%-dy quraıdy.